Polisi y’u Rwanda ikorera mu karere ka Bugesera k’ubufatanye n’ubuyobozi bw’akarere bakanguriye abagize komite z’abagore ku rwego rw’imirenge ndetse n’abaganga mu bigo nderabuziba kujya bakurikirana bya hafi ibibazo by’ihohotera rishingiye ku gitsina rikorerwa abana b’abakobwa.

Ni ibiganiro byabaye tariki 03 Ukwakira, bihuza abagize komite z’abagore bo mu mirenge ya Ngeruka, Nyamata na Nyarugenge ndetse n’abaganga mu bingo nderabuzima byo muri iyo mirenge.

Ibi biganiro byari byitabiriwe na Imanishimwe Yvette, umuyobozi w’akarere wungirije ushinzwe imibereho myiza y’abaturage.

Mu kiganiro cye yasabye abagize komite z’abagore ku rwego rw’imirenge kujya begera imiryango y’abana b’abakobwa bakabaganiriza,cyane cyane mu nama z’umugoroba w’ababyeyi.

“Uburyo bwiza bwo guhangana n’ikibazo k’ihohoterwa rikorerwa abana b’abakobwa ni ukwegera aba bana ndetse n’ababyeyi babo mu nama z’umugoroba w’ababyeyi mukaganira, mukarebera hamwe igitera iki kibazo maze mugafatira hamwe ingamba zo kukirwanya.”

Yakomeje abasaba kujya bakangurira ababyeyi kwita ku burere bw’abana babo cyane cyane abakobwa.

 Mu kiganiro cyatanzwe n’umupolisi ushinzwe guhuza ibikorwa bya Polisi n’izindi nzego (DCLO) mu karere ka Bugesera. Assisstant Inspector of Police (AIP) Benjamin Muhawenimana yakanguriye abagize komite z’abagore kujya bakurikiranira hafi imibereho y’abana b’akobwa bari munsi y’imyaka 18 kuko byamaze kugaragara ko bashukika cyane bigatuma bakorerwa ihohotera rishingiye ku gitsina.

Yagize ati”:Akenshi  abana b’abakobwa bari munsi y’imyaka 18 abagabo n’abasore babashukisha utuntu, byakubitana n’uko wenda mu miryango hari ikibazo cy’ubushobozi buke bw’amafaranga bigatuma baterwa inda.

 AIP Muhawenimana yakomeje asaba abaganga bari muri ibyo biganiro kujya bihutira gutanga amakuru y’abana b’abakobwa babagezeho bahuye n’ikibazo cy’ihohoterwa.

Abari bitabiriye ibi biganiro bishimiye inama bagiriwe biyemeza ko bagiye gukosora aho bakoraga amakosa, cyane cyane bakarushaho kwegera abana b’abakobwa n’imiryango yabo kugira ngo barebere hamwe uko iki kibazo cyacika mu karere ka Bugesera.

Urwego rw’Igihugu rushinzwe ubugenzacyaha mu karere ka Bugesera(RIB) rugaragaza ko icyaha cy’ihohoterwa rishingiye ku gitsina rikorerwa abana b’abakobwa kiza mu byaha 5 bya mbere,ndetse kiba kigenda kiyongera uko iminsi yicuma.

Muri Nyakanga hagaragaye amadosiye 4, muri Kanama hagaragaye 5 naho mu kwezi kwa Nzeri hagaragaye amadosiye 6 y’abana b’abakobwa bakorerwe ihohoterwa rishingiye ku gitsina bari munsi y’imyaka 18.