POLISI Y'U RWANDA

Mu kigo cy’Urwunge rw’amashuri rwa Musenyi giherereye mu karere ka Bugesera, mu Ntara y’I Burasirazuba  habereye igikorwa cyo gukangurira urubyiruko rw’abanyeshuri 1000  biga muri icyo kigo ku byerekeranye no no kurwanya ibiyobyabwenge. Ibi biganiro ku kwirinda ibiyobyabwenge bikaba byarabaye tariki ya 25 Gicurasi 2015, bikaba byaratanzwe na Polisi y’u Rwanda ikorera mu karere ka Bugesera.

 Ushinzwe guhuza ibikorwa bya Polisi y’u Rwanda n’abaturage hagamijwe kurwanya no gukumira ibyaha mu karere ka Bugesera Assistant Inspector of Police  (AIP) Cyprien Uwitonze yabigishije  ubwoko bw’ibiyobyabwenge, ingaruka zabyo, n’uruhare rwabo mu kurwanya inyobwa, itundwa n’icuruzwa ryabyo.

 Uretse abo banyeshuri, iyo nama yabereye muri iki kigo cy’ishuri kiri ,mu murenge wa Musenyi, yari yanitabiriwe  kandi n’abayobozi ndetse n’abarezi bacyo.

 IP Uwitonze  yabwiye abo banyeshuri ko ibiyobyabwenge birimo urumogi,  Kanyanga  ndetse, n’inzoga zitemewe mu Rwanda nka Muriture, Ibikwangari,  biri ku isonga mu bitera ibyaha nk’ubujura, urugomo, gufata ku ngufu no gusambanya abana.

 Yagize ati:"Ibi bitera umutekano muke, akaba ari yo mpamvu buri wese akwiye kwirinda kubinywa, kubitunda no kubicuruza, kandi agatanga amakuru ku gihe ku babikora."

 Yababwiye ko bishobora kubashora mu ngeso mbi nk’ubusambanyi, bugira ingaruka zirimo gutwara inda z’indaro, kuva mu ishuri, kwirukanwa mu muryango kuri bamwe , ipfunwe , ubuzererezi, ubwomanzi, no kwandura zimwe mu ndwara zandurira mu mibonano mpuzabitsina.

Umunyeshuri wari uhagarariye bagenzi be Ingabire Liliane wiga mu mwaka wa gatanu  mu ndimi, ubukungu n’ubumenyi bw’isi, yashimiye Polisi kuba yari yaje kubahugura. Yakomeje avuga ko we na bagenzi be bafashe ingamba zo gukangurira urundi rubyiruko kwirinda ibiyobyabwenge kuko nta nyungu ku babinywa uretse kubakururira ibibazo.

Umuyobozi w’ikigo cy’Urwunge rw’Amashuri rwa Musenyi Rwabuhaya Jean Jacques nawe yashimiye Polisi y’u Rwanda kuba ibahora hafi mu bikorwa bitandukanye by’iterambere n’umutekano ariko ashima by’umwihariko kuba baragejejweho ikiganiro ku kwirinda ibiyobyabwenge dore ko byagaragaye ko hari rumwe mu rubyiruko rw’abanyeshuri rusigaye rubyijandikamo.

Uyu muyobozi akaba yaravuze ko bazakomeza gufatanya na Polisi mu kubirwanya kugira ngo urwo rubyiruko rw’abanyeshuri ruzabashe kwiga neza bityo rukazagirira igihugu n’imiryango yabo akamaro.