Kinyarwanda
English
Abagize urwego rwo kwicungira umutekano (Community Policing Committees-CPCs) bo mu murenge wa Ruhuha, mu karere ka Bugesera, bakanguriwe kongera imbaraga mu gukumira ibyaha nka bumwe mu buryo bwo kurushaho kubumbatira umutekano muri uyu murenge no mu karere muri rusange.
Ibi babyibukijwe mu nama yabahuje ku itariki 11 Gicurasi n’Umunyamabanga Nshingwabikorwa w’uriya murenge, Mushenyi Innocent, ikaba yaritabiriwe kandi n’ushinzwe guhuza ibikorwa ba Polisi y’u Rwanda no gukumira ibyaha mu karere ka Bugesera, Assistant Inspector of Police (AIP) Cyprien Uwitonze.
Mushenyi yabashimiye ubufatanye bwabo mu kunganira inzego z’umutekano mu kubungabunga umutekano muri uyu murenge, bityo ababwiye kujya bagisha inama mu gihe bibaye ngombwa, kurushaho kwegera abaturage no gufatanya nabo mu kubungabunga umutekano.
Bakiri muri iyo nama yabereye mu kagari ka Ruhuha, Mushenyi yababwiye kujya buzuza ibitabo by’imidugudu neza kugirango bamenye abinjiye n’abasohotse mu duce batuyemo, bityo bashobore kurushaho gukumira no kurwanya ibyaha.
AIP Uwitonze yababwiye kurushaho kurwanya ibiyobyabwenge, birimo urumogi, kuko uretse kuba ubwabyo bibujijwe, bituma ababinyoye bakora ibindi byaha nko gukubita no gukomeretsa, ubujura, ihohoterwa rishingiye ku gitsina, gufata ku ngufu no gusambanya abana.
Yabakanguriye kandi kugira uruhare mu kurwanya icuruzwa ry’abantu, babwira abaturage ko iyo babagejeje hanze aho baba babijeje kubaha cyangwa kubashakira akazi n’amashuri byiza, babafata bunyago maze bakabakoresha imirimo y’agahato kandi nta gihembo.
Ibindi yababwiye kongeramo imbaraga harimo gukora neza amarondo, gukangurira abaturage, kuba ijisho rya mugenzi wabo, kwitabira gahunda za Leta, kutihanira, no gutanga amakuru ku gihe yatuma hakumirwa ibyaha muri rusange.
