POLISI Y'U RWANDA

Irondo ry’umwuga ni urwego rushyirwaho n’inzego z’ibanze rukagira uruhare mugufasha Polisi y’u Rwanda n’izindi nzego z’umutekano kurwanya ibyaha ndetse no kubungabunga umutekano.

Ni muri urwo rwego kuri uyu wa 2 Nyakanga, Polisi ikorera mu karere ka Bugesera yahuguye abakora irondo ry’umwuga bo mu murenge wa Kamabuye.  

Umupolisi ushinzwe uburere mboneragihugu no guhuza ibikorwa bya Polisi n’abaturage mu karere ka Bugesera, Assistant Inspector of Police (AIP) Benjamin Muhawenimana yabwiye abakora irondo ry’umwuga mu murenge wa Kamabuye ko ari imboni z’abaturage bityo bakwiye kurangwa n’ubunyangamugayo muri byose.

Yagize ati “Nimwe mufasha Polisi gucunga umutekano aho itari, mukwiye rero kurangwa no gukora kinyamwuga n’ubunyangamugayo mu kazi kanyu ka buri munsi mukora kuko bizatuma abaturage barushaho kubizera ndetse bizere n’imikorere yanyu, bityo kuko arimwe muri hafi yabo bizatuma umuturage ugize ikibazo abasha kubitabaza mu buryo bworoshye.”

AIP Muhawenimana yasabye abakora irondo ry’umwuga kwicungira umutekano aho batuye mu rwego rwo gufasha inzego z’umutekano kuwusigasira,yongeraho ko bagomba kujya bakurikirana amakuru bakamenya igishobora guhungabanya ituze ry’abaturage aho batuye bakagikumira kitaraba.

Yagize ati “Aho mutuye hari ibyaha bihakorerwa nk’ubujura, amakimbirane yo mu ngo, ubusinzi bukabije buteza urugomo, ubucuruzi bw’ibiyobyabwenge n’ibindi, mukwiye gufata iya mbere mu kubirwanya mufata ababikora byananirana mugatungira agatoki inzego z’umutekano ababigiramo uruhare bafatwe bashyikirizwe inzego z’ubutabera.”

Yakomeje ababwira ko umutekano udahungabanira k’ubutaka gusa kuko no mu mazi hari ibyaha bihakorerwa nk’uburobyi butemewe, kunyuza magendu mu nzira z’amazi,gukoresha ibikoresho bitemewe mu burobyi n’ibindi, bityo ko bakwiye kugira uruhare mu kubungabunga umutekano wo mu mazi. Yanababwiye ko bakwiye  kumenya inshingano zabo mugucunga umutekano, kuko hari bamwe muri bagenzi babo biha ububasha badafite bikabaviramo  gukora amakosa akomeye nko gukubita abaturage n’ibindi.

AIP Muhawenimana yasabye abakora irondo ry’umwuga kwirinda no kurwanya ibiyobyabwenge aho biva bikagera batanga amakuru y’ababikoresha.

Aba banyerondo nyuma y’ibiganiro bahawe biyemeje kurushaho gukora kinyamwuga no kujya batangira amakuru ku gihe ku bintu byose bishobora guhungabanya umutekano.