Kinyarwanda
English
Kuri uyu wa Mbere tariki ya 23 Gashyantare, ba ofisiye bakuru biga mu ishuri rikuru rya Polisi (NPC) mu Karere ka Musanze, batangiye urugendoshuri bazakorera mu bigo bitandukanye mu ntara zose z’igihugu mu rwego rwo guhuza ibyo bigira mu ishuri n'ibikorerwa mu kazi.
Ni urugendoshuri ruzamara icyumweru, rwitabiriwe n’abagera kuri 38 bagize icyiciro cya 14 cy'amasomo amara umwaka mu bijyanye n’amahoro no gukemura amakimbirane, bakomoka mu bihugu 10 by’Afurika ari byo; Repubulika ya Santrafurika, Eswatini, Gambia, Kenya, Malawi, Namibia, Somalia, Sudani y’Epfo, Uganda n’u Rwanda.
Ku nsanganyamatsiko igira iti: ‘Gushimangira uburyo bushingiye ku muryango mu gukemura amakimbirane hagamijwe amahoro n’umutekano birambye’, ruzibanda by’umwihariko ku bintu bitatu by’ingenzi ari byo; imikorere y’Abunzi (Community Mediation Committees), Inteko z’Abaturage (Community Assemblies) n’Imigoroba y’Imiryango (Family Forums).
Mu gitondo cy’uyu munsi ari nawo wa mbere w'urugendoshuri, basuye Minisiteri y’Ubutegetsi bw’Igihugu, mu murenge wa Kimihurura, akarere ka Gasabo, aho bahawe ikiganiro cyagarutse ku ruhare rw'imiyoborere myiza mu kubumbatira amahoro n'umutekano birambye.
Minisitiri w'Ubutegetsi bw'igihugu Habimana Dominique, yabagaragarije ko amahoro n’umutekano ari umusaruro w’imiyoborere myiza, kandi iyo ubuyobozi bwegereye abaturage, bibafasha kwirinda amakimbirane ashobora kuvamo imvururu zihungabanya umutekano.
Yagize ati: “Amahoro ni igihe hari icyizere hagati y’abaturage n’inzego z’ubuyobozi, ndetse n’icyizere abaturage bagirirana hagati yabo. Umutekano muke burya utangira mbere, iyo abaturage bamwe bahejwe, bagaragaza ibibazo ntibishakirwe ibisubizo, ntibahabwe umwanya ngo batange ibitekerezo cyangwa se bumva ko ubuyobozi bubari kure. Niyo mpamvu ikijyanye n’imiyoborere myiza tugishyira imbere kuko ari yo nkingi y'ibanze mu kubaka icyizere ku bagenerwabikorwa, gukumira amakimbirane no kubanisha baturage.”
Minisitiri Habimana yagaragaje ko imiyoborere y’u Rwanda ishingiye ku kwegereza ubuyobozi abaturage, hagamijwe ko abayobozi bamenya ubuzima abaturage babamo umunsi ku munsi.
Umuyobozi w’ishuri rikuru rya Polisi, Commissionner of Police (CP) Christophe Bizimungu, yavuze ko urugendoshuri rukorwa n'abanyeshuri; ari imwe muri gahunda y’amasomo ahabwa ba Ofisiye bakuru bo mu nzego zishinzwe kubahiriza amategeko kugira ngo bibafashe kunguka ubumenyi ku bikorerwa mu kazi no kubihuza n'inyigisho baba barigiye mu ishuri.
Yagaragaje ko nk'uko insanganyamatsiko ibivuga, urugendoshuri ruzabafasha gusesengura uruhare rw’uburyo bushingiye ku muryango n'inzego z'ubuyobozi zitorerwa n'abaturage bigira mu gukumira amakimbirane, kuyakemura, kunga no gushimangira ubumwe mu Rwanda.
Ba ofisiye bakuru mu nzego zishinzwe iyubahirizwa ry’amategeko bakomoka mu bihugu bitandukanye by'Afurika, mu gihe cy'umwaka bamara biga mu Ishuri rikuru rya Polisi, bahabwa amasomo akubiye mu bice bitandukanye, arimo ay’icyiciro cya gatatu cya Kaminuza mu bijyanye n'amahoro no gukemura amakimbirane, ubumenyi ku miyoborere n’ajyanye n’ibikorwa byo kubungabunga amahoro.
