Kinyarwanda
English
Abapolisi n'abo mu zindi nzego zishinzwe iyubahirizwa ry'amategeko bagera kuri 206 bo mu rwego rwa ba ofisiye bato bari mu mahugurwa mu Kigo cya Polisi gitangirwamo amahugurwa yo Kurwanya iterabwoba (Counter Terrorism Center-CTTC) giherereye i Mayange mu Karere ka Bugesera, kuri uyu wa Kane tariki ya 25 Kamena, bakoze urugendoshuri mu mujyi wa Kigali.
Intego y’uru rugendoshuri igamije kubafasha guhuza amasomo bigira muri ayo mahugurwa ajyanye n’Ubuyobozi bwa Sitasiyo (PSCC) n'ibikorerwa mu kazi ka buri munsi.
Abanyeshuri bitabiriye urugendoshuri bagize icyiciro cya gatatu (3) cy'amahugurwa bamaramo amezi 3 barimo; abapolisi 196 bo mu rwego rwa ba Ofisiye bato n'icumi (10) bo mu rwego rw' Igihugu rushinzwe Ubugenzacya (RIB), bose bakaba bakomoka mu Rwanda.
Basuye ahantu hatandukanye harimo; Urwibutso rwa Jenoside rwa Kigali ku Gisozi, Ingoro ndangamurage y'amateka y'urugamba rwo guhagarika Jenoside ruherereye ku Nteko Ishinga amategeko ku Kimihurura ndetse n' Ishami rishinzwe ikoranabuhanga muri Polisi (Command and coordination center).
Ubwo bageraga ku rwibutso rwa Jenoside rwa Kigali, basobanuriwe uburyo abanyarwanda bari babanye neza mbere y'uko abakoloni bagera mu Rwanda bakabacamo ibice bishingiye ku moko batari basanzwe bafite kugeza igihe bigera kuri Jenoside yakorewe Abatutsi mu 1994.
Ku Ngoro ndangamurage y'amateka y'urugamba rwo guhagarika Jenoside, baganirijwe ku bikorwa by'ubutwari n'amateka byaranze urugamba rwo kubohora igihugu no guhagarika Jenoside yari irimo ikorwa mu gihugu, ndetse banerekwa n'amwe mu mafoto yaranze ibyo bikorwa.
Banasuye kandi Ishami rishinzwe ikoranabuhanga muri Polisi (Command and coordination center) basobanurirwa imikorere y'iri shami n'uruhare rwaryo mu gukumira no gutahura ibyaha hifashishijwe ibikoresho bigezweho by'ikoranabuhanga.
Umuyobozi ushinzwe amasomo mu kigo gitangirwamo amahugurwa yo kurwanya iterabwoba cya Mayange, Assistant Commissioner of Police (ACP) Méthode Munyaneza, wari uyoboye abo banyeshuri, yavuze ko uru rugendoshuri rufasha abanyeshuri kuzuza no guhuza amasomo baba bize mu ishuri n'uburyo ashyirwa mu bikorwa ndetse no gusobanukirwa ibyaranze amateka y’igihugu cyacu.
Yagize ati: “Intego nyamukuru y’uru rugendo ni ukwigisha ba ofisiye amateka n’inkomoko ya Jenoside yakorewe Abatutsi mu 1994, kugira ngo barusheho gusobanukirwa neza inkomoko n’ingaruka zayo bityo bizabafashe kugira uruhare mu gukumira ibikorwa byose bishobora guhungabanya ubumwe bw’Abanyarwanda.”
ACP Munyaneza yakomeje avuga ko gusura inzego zitandukanye za Leta biha aba ba ofisiye amahirwe yo kurushaho kumenya uburyo inzego zikorana mu guteza imbere imiyoborere myiza, kubahiriza amategeko no kubungabunga umutekano w’igihugu n'abagituye muri rusange.
Yanavuze ko uru rugendoshuri rugamije na none kubaka indangagaciro n’ubunyamwuga mu bapolisi n'izindi nzego zishinzwe iyubahirizwa ry'amategeko, kugira ngo barusheho kuzuza neza inshingano zabo mu buryo buboneye kandi bukozwe mu mucyo n'ubutabera.
