Kinyarwanda
English
Ku wa Kabiri tariki ya 30 Ukuboza 2025, abagize inzego z’umutekano bari mu mahugurwa mu Ishuri rikuru rya Polisi (NPC) riherereye mu Karere ka Musanze, bagiriye urugendoshuri mu Mujyi wa Kigali rugamije kubafasha guhuza amasomo yo ku Ishuri n’amateka abitse muri site z’igihugu zitandukanye basuye.
Ni amahugurwa y’icyiciro cya 13 agenerwa ba ofisiye bato ((Police Junior Command and Staff Course-PJCSC), aba agamije kubatoza ubuyobozi no gukemura amakimbirane, yitabiriwe n’abagera kuri 47 bo mu nzego z’umutekano zirimo Polisi y’u Rwanda, Urwego rw’Igihugu Rushinzwe Igorora (RCS) n’Urwego rw’igihugu rushinzwe Ubugenzacyaha (RIB).
Basuye Urwibutso rwa Jenoside rwa Kigali, ku Gisozi, Ingoro Ndangamateka y’urugamba rwo guhagarika Jenoside ku Kimihurura n’igicumbi cy’intwari, i Remera, hose mu Karere ka Gasabo, bahabwa inyigisho zirebana n’amateka mabi yaranze igihugu yaje kubyara Jenoside yakorewe Abatutsi mu 1994, kugeza ubwo yahagarikwaga n’ingabo zari iza RPA.
Umuyobozi w’Ishami rishinzwe ubushakashatsi mu Rwego rushinzwe intwari z’igihugu, Imidali n’impeta by’ishimwe (CHENO), Rwaka Nicolas, yagarutse ku gisobanuro cyo gukunda igihugu n’icyo bisaba by’umwihariko ku bagize inzego z’umutekano.
Yagize ati: “Gukunda igihugu nibyo bibyara ubutwari kandi bikagirira benshi akamaro. Iyo bigeze ku bakora mu nzego z’umutekanio biba umwihariko kuko bo banacyitangira iyo bibaye ngombwa.”
Yashimiye abitabiriye urugendoshuri ku bushake n’umuhate bafite wo kumenya amateka y’igihugu, by’umwihariko ayaranze intwari z’u Rwanda, abashishikariza kuzagera ikirenge mu cyazo, bakomeza kwimakaza ubumwe, gukunda igihugu, kugikorera no kucyitangira, gukunda umuco wacyo, ibirango no kubirinda, gukorera inyungu rusange kurusha inyungu bwite no guharanira ko umuturage ahora ku isonga n’ibindi.
Chief Superintendent of Police (CSP) Jean Damascene Katabarwa Hatangimana, wari ubayoboye mu rugendoshuri yavuze ko urugendoshuri nk’uru n’izindi abanyeshuri bakora, ari rimwe mu masomo kandi zigira uruhare rukomeye mu gushimangira imyigire.
Yagize ati: “Urugendoshuri uretse kuba rufasha abari ku mahugurwa gusobanukirwa neza ibyo baba barigishijwe mu ishuri narwo ruba rukubiye mu masomo yo ku nteganyanyigisho. Mbere y’uko rukorwa babanza gusobanurirwa iby’ibanze ku hantu bagiye gusura, ubumenyi bahakura bukaba impamba ibaherekeza bigatuma barushaho kunoza imikorere mu kazi kabo ka buri munsi.”
