Kinyarwanda
English
Umuyobozi Mukuru wa Polisi y'u Rwanda wungirije ushinzwe ibikorwa (DIGP), CP Vincent Sano, kuri uyu wa Gatanu tariki ya 3 Nyakanga, yasoje ku mugaragaro icyiciro cya 3 cy’amahugurwa yihariye yo kuyobora sitasiyo ya Polisi no gukemura amakimbirane (Police Station commanders’ course 03/2026).
Ni amahugurwa yari amaze amezi atatu (3), abera mu kigo cya Polisi gitangirwamo amahugurwa yo kurwanya iterabwoba (Counter-Terrorism Training Center-CTTC) giherereye i Mayange mu Karere ka Bugesera, akaba yaritabiriwe n'abagera kuri 206 barimo abapolisi 196 n’abandi 10 b’urwego rw’igihugu rw’Ubugenzacyaha (RIB).
DIGP Sano agaruka ku ruhare rw’aya mahugurwa, yavuze ko sitasiyo ari urwego rw’ibanze rwa Polisi ruyihuza n’abaturage bityo abashishikariza kwimakaza ubuyobozi bushingiye ku bunyangamugayo, ubunyamwuga n’imyitwarire myiza.
Yagize ati: “Ndabashishikariza kwimakaza ubuyobozi bushingiye ku ndangagaciro nk’abahagarariye inzego zishinzwe kugenzura iyubahirizwa ry’amategeko, mufite inshingano zo kurushaho gushimangira icyizere abaturage bagirira inzego zacu z’umutekano binyuze mu mikoranire myiza, muzafate neza kandi mwite ku bo muyobora, ndetse muzimakaze imikorere ya kinyamwuga mu byemezo byose mufata n’ibikorwa byose mukora.”
Yabashimiye kuba basoje amahugurwa, abibutsa ko amasomo bize atari ukuzayobora za Sitasiyo gusa ahubwo azabafasha no gukora neza akazi kose bazahabwa ndetse anabashishikariza guhora bafite inyota yo kunguka ubumenyi, kuko ari bwo buzagira umumaro kandi bugatanga umusaruro mwiza ku mutekano w’abantu n’ibyabo.
Ati: “Musoje amahugurwa yihariye yo kuyobora Sitasiyo, uko mwitwaye neza muri hano mu masomo turabasaba no kuzabikomeza mu kazi mugiyemo mu mashami atandukanye ya Polisi yú Rwanda. Mugomba rero kudatezuka, mugahora muharanira kurinda umutekano w’abaturage mubitaho mufatanya mu gukumira ibyaha, mwirinda icyahesha isura mbi mwebwe ubwanyu, Polisi y’u Rwanda, urwego rw’igihugu rw’Ubugenzacyaha n’igihugu muri rusange.
Umuyobozi w’Ikigo gitangirwamo amahugurwa yo kurwanya iterabwoba, Commissioner of Police (CP) William Kayitare yavuze ko bize amasomo atandukanye arimo; imiyoborere ya za Sitasiyo, ibikorwa byo gucunga umutekano, amasomo y’itumanaho, ubuyobozi n’imicungire y’abakozi, ubugenzacyaha, ibijyanye n’ubushakashatsi, uburyo bwo guhangana n’ibibazo by’umutekano w’igihugu, iperereza n'imikoreshereze y’intwaro, bakora n’urugendoshuri mu rwego rwo guhuza ibyo bize n’ibikorerwa mu kazi ahantu hatandukanye.
CP Kayitare yashimiye ishyaka n’ubwitange byabaranze, ashimira n’abarimu batanze amahugurwa ku murava, ubunyamwuga, n’ubwitange bagaragaza mu gutanga amasomo ndetse n’ubuyobozi bukuru bwa Polisi y’u Rwanda ku nkunga budahwema guha Ishuri yaba iy’ibikoresho, inama, n’ubufasha byose bifasha mu migendekere myiza y’amahugurwa.
