POLISI Y'U RWANDA

Kuri uyu wa Gatanu tariki ya 19 Kamena, mu Ishuri Rikuru rya Polisi (NPC) riherereye mu Karere ka Musanze, habereye umuhango wo gusoza amasomo ya ba Ofisiye Bakuru 38 bakomoka mu bihugu icumi (10) bitandukanye byo muri Afurika.

Abofisiye bakuru basoje bagize icyiciro cya 14 cy’amasomo ajyanye n’ubuyobozi, baturutse mu nzego zishinzwe kubahiriza amategeko barimo 23 bo mu Rwanda na 15 baturutse mu bihugu by’inshuti by’Afurika icyenda ari byo; Eswatini, Gambia, Kenya, Malawi, Namibia, Repubulika ya Santrafurika, Somalia, Sudani y'Epfo na Uganda.

Muri uyu muhango wo kubashimira no kubashyikiriza impamyabumenyi wayobowe na Minisitiri w’Uburezi mu gihugu, Nsengimana Joseph, wanitabiriwe n’Umuyobozi Mukuru wa Polisi y’u Rwanda, abayobozi bakuru batandukanye mu nzego z'umutekano, abadipolomate ndetse n'imiryango y'abanyeshuri basoje amasomo.

Minisitiri Nsengimana yibukije abasoje amasomo ko guhabwa impamyabumenyi    bidahagarika umuntu kwiga, ashimangira ko abakora mu nzego z'umutekano muri iki gihe bagomba gukomeza kwihugura kugira ngo bahangane n’ibibazo by’umutekano bigenda birushaho kuba byinshi no guhindagurika byihuse.

“Nk’abayobozi, mugomba gukomeza kwiyungura ubumenyi, kwiyubaka no kwakira impinduka hagamijwe guhangana n'imbogamizi zikomeje kugaragara mu bijyanye n'umutekano.”

Agaruka ku biranga umuyobozi mwiza, yashimangiye akamaro k’imyumvire myiza, ubumenyi ngiro n’ubumenyi busanzwe mu kazi ka Polisi ka none.

Yagize ati: “Ubumenyi budufasha gusobanukirwa ibibazo duhura na byo. Ubumenyi ngiro budushoboza kubikemura neza. Ariko imyumvire ni yo igena uburyo tuyobora, dukorera abaturage kandi tugatera abandi imbaraga. Abayobozi beza kurusha abandi ni abahuza ibi byose.”

Minisitiri yanagaragaje akamaro ko gutekereza mu buryo bw’igihe kirekire, kuyobora mu buryo buboneye, ubufatanye bw’akarere no kubahiriza uburenganzira bwa muntu mu guhangana n’ibibazo by’umutekano biriho muri iki gihe.

Umuyobozi Mukuru wa Kaminuza Nyafurika yigisha iby’ubuyobozi (ALU), Madamu Sidee Dlamini, yagaragaje ko ubufatanye hagati y'iyi Kaminuza na Polisi y’u Rwanda bwatanze umusaruro ukomeye, kuko mu myaka itanu ishize bwabyaye ibyiciro bitanu by’abarangije amasomo, bingana n’abanyeshuri 165.

Yagize ati: “Byatangiye ari icyerekezo cyari gishya kandi gikomeye, ubu cyahindutse urugero rwiza rw’uburyo inzego za Afurika zishobora gukorana.” 

Dlamini yongeyeho ko akazi ka Polisi muri iki gihe gasaba abayobozi bashoboye guhanga udushya, gukemura ibibazo bikomeye byambukiranya imipaka no gukorera abaturage mu bunyangamugayo.

Yagize ati: “Mu gihe musubiye mu bihugu byanyu, muzazirikane kuyobora mutabogama murangwa n’ubunyangamugayo nk’indagaciro iruta izindi. Mukomeze kubaka no gukora ibyiza mutabibwirijwe."

Umuyobozi Mukuru wungirije wa Kaminuza y’u Rwanda, Assoc. Prof. Didas Kayihura, yasabye abarangije amasomo gukoresha ubumenyi, ubushobozi n'ubunararibonye  bungukiye muri gahunda y’amasomo mu guteza imbere amahoro no gukemura amakimbirane mu buryo burambye mu bihugu bakomokamo no mu karere muri rusange.

Yagize ati: “Mujye mushishoza kandi mube ab'ibanze mu guhosha amacakubiri no gukemura amakimbirane aho byagaragaye. Muzabe abayobozi batega amatwi abo bayobora, kuko umuyobozi akorera abandi, kandi akabubakamo icyizere.”

Aya masomo ba Ofisiye bakuru bayiga mu gihe cy'umwaka umwe mu ishuri rikuru rya Polisi, ku bufatanye na Kaminuza y’u Rwanda (UR) na Kaminuza Nyafurika yigisha iby’ubuyobozi (ALU), baturuka mu nzego zishinzwe iyubahirizwa ry’amategeko, bahabwa amasomo akubiye mu bice bitatu bitandukanye birimo ajyanye n'amahoro no gukemura amakimbirane abahesha impamyabumenyi y’icyiciro cya gatatu cya Kaminuza (Masters), amasomo ku miyoborere ihamye, n’ayerekeranye no kuyobora ibikorwa byo kubungabunga amahoro.