POLISI Y'U RWANDA

Kuri uyu wa Gatatu tariki ya 13 Gicurasi, abanyeshuri 150 bo ku rwego rwa ofisiye bari ku masomo mu ishuri rya Polisi ry'amahugurwa (PTS) i Gishari mu Karere ka Rwamagana, basoje  urugendoshuri rw'iminsi ibiri, rugamije kubafasha guhuza amasomo bigira mu ishuri n'ibikorerwa mu kazi umunsi ku munsi.

Ni  amahugurwa y'icyiciro cya 18, bazamaramo igihe cy'amezi 4, biga ibijyanye n'ubunyamwuga, ubuyobozi no gukemura amakimbirane (PTCC), yitabiriwe n'abanyeshuri baturutse mu nzego zishinzwe iyubahirizwa ry’amategeko zitandukanye mu Rwanda.

Barimo abapolisi 135 bo ku rwego rwa ba Ofisiye, batanu (5) bo mu rwego rw’Igihugu rushinzwe Ubugenzacyaha (RIB), batanu (5) bo mu rwego rw’Igihugu rushinzwe Igorora (RCS) na batanu (5) bo mu rwego rw’igihugu rushinzwe Iperereza n’Umutekano (NISS).

Basuye uturere twose tw’Umujyi wa Kigali, Ingoro ndangamateka yo kubohora igihugu iherereye mu karere ka Gicumbi, Urwibutso rwa Jenoside rwa Kigali ku Gisozi, Igicumbi cy'intwari i Remera, basura n'Ingoro ndangamurage y'amateka y'urugamba rwo guhagarika Jenoside ruherereye ku Nteko Ishinga amategeko ku Kimihurura.

Chief Superintendent of Police (CSP) Boniface Niyitegeka ushinzwe amasomo mu kigo cy'amahurwa cya Gishari, yavuze ko uru rugendoshuri rugamije kubafasha kwiga amateka yaranze u Rwanda no guhuza ubumenyi bigira mu ishuri n’ishyirwa mu bikorwa ryabwo mu nzego zitandukanye z’igihugu.

Yagize ati: “Uru rugendoshuri rufasha abanyeshuri kuzuza no guhuza amasomo baba bize mu ishuri n'uburyo ashyirwa mu bikorwa mu kazi gakorerwa mu nzego z'igihugu zitandukanye."

Yakomeje ati: "Mu ishuri biga ibijyanye no kuyobora, tuba dukeneye ko babona ingero z’ahabaye imiyoborere mibi mu gihe cyashize n’ingaruka zayo ku benegihugu ndetse n’urugero rw’imiyoborere myiza mu mibereho myiza n'iterambere ry'ubukungu nk’uko bigaragara mu mateka n’imibereho by’igihugu cyacu.”

CSP Niyitegeka yasabye  abanyeshuri gufata neza ibyo bize bikazabafasha mu gukumira icyo ari cyo cyose cyahungabanya umutekano w’abaturarwanda ndetse n’ibyabo.

SP Elam  Nayihiki, umwe mu banyeshuri, yavuze ko uru rugendoshuri rwamwunguye ubumenyi bw’ingenzi ku gisobanuro cy'ubwitange no kwimakaza ubumwe byiyongera ku nshingano z’inzego z’umutekano zo kurinda abaturage n'ibyabo.

Yavuze ko gusura urwibutso rwa Jenoside n'Ingoro ndangamurage y'amateka y'urugamba rwo guhagarika Jenoside byamweretse ingaruka z’ubuyobozi bubi ndetse n’ubutwari bw’abaharaniye guhagarika Jenoside, bikaba bimwigishije ko inshingano z’umuyobozi atari ugutegeka gusa, ahubwo ari no gutanga urugero rwiza, gufata ibyemezo bishingiye ku kuri no kurengera inyungu rusange.

Uru rugendoshuri n'izindi zikorwa n'abitabira amahugurwa,  zitegurirwa abanyeshuri bitegura gusoza amasomo hagamijwe kubafasha gusobanukirwa amateka y’u Rwanda; kumenya no kwimakaza indangagaciro z’ubutwari n'iz'ubuyobozi bufite icyerekezo, ubunyangamugayo n’ubwitange bikwiye kubaranga byose byunganira amasomo baba bigiye mu ishuri.