POLISI Y'U RWANDA

Polisi y’u Rwanda ikorera mu Ntara y’Amajyepfo yatangiye ibiganiro bihuza urubyiruko rw’abakorerabushake. Ni ibiganiro bigamije kubibutsa uruhare rwabo mu kubumbatira umutekano ndetse n’iterembere ry’abaturage. Ibi biganiro byatangiye kuri uyu wa Mbere tariki ya 2 Ugushyingo bitangirira mu Karere ka Huye bihuza urubyiruko 200 ruhagarariye urundi  mu mirenge 14 igize akarere ka Huye.

Umuyobozi wa Polisi mu Ntara y’Amajyepfo, Chief Superintendent of Police(CSP) Innocent Kanyamihigo ari kumwe n’umuyobozi w’akarere ka Huye wungirije ushinzwe ubukungu n’iterambere, Andre  Kamana nibo batanze ibiganiro. Hari n’umuhuzabikorwa w’urubyiruko rw’abakorerabushake mu Karere ka Huye, Musangwamfura Emmanuel.

Mu kiganiro cya CSP Kanyamihigo yibukije urubyiruko ko aribo shingiro ry’umutekano w’igihugu, abasaba kujya bihutira gukumira icyaha kitaraba batangira amakuru ku gihe.

Ati “Mubana n’abaturage umunsi kuwundi, ibibera mu isibo, umudugudu kugeza ku murenge muba mubizi. Turabasaba gukomeza kuba abafatanyabikorwa ba Polisi ndetse n’izindi nzego, mugakumira icyaha kitaraba mutangira amakuru ku gihe.”

Yabakanguriye  kwibanda cyane ku kurwanya ibyaha bikunze kugaragara mu Ntara y’Amajyepfo harimo amakimbirane mu miryango, ibiyobyabwenge, ubucukuzi bw’amabuye y’agaciro butubahirije amategeko n’ubucuruzi bwa magendu.

Umuyobozi wa Polisi mu Ntara y’Amajyepfo yasabye urubyiruko kurangwa no gukunda igihugu bima amatwi umuntu wese washaka kubayobya.

Ati “Muri iki gihe hari abanzi b’u Rwanda bifashisha ikoranabuhanga (imbuga nkoranyambaga) bagakwiza ibihuha bigamije kuyobya no kurangaza abaturarwanda n’inshuti z’u Rwanda. Murasabwa kujya mubyima amatwi kandi namwe mukifashisha iryo koranabuhanga mubanyomoza.”

Umuyobozi w’akarere ka Huye wungirije ushinzwe ubukungu n’iterambere, Andre Kamana yasabye urubyiruko kwibumbira mu makoperative kugira ngo babashe kwiteza imbere.

Ati  “Mugomba guharanira kwiteza imbere mukarwanya ubukene. Turabashishikariza kwibumbira mu makoperative mugahanga iminshinga ibyara inyungu mukiteza imbere mwebwe ubwanyu ndetse n’uwaza kubunganira akabona aho ahera.”

Kamana yanasabye uru rubyiruko kwegera abaturage bakabigisha uko barushaho kuzamura imibereho yabo bakanakurikiza gahunda za Leta.

Ati  “Mwese murajijutse, bamwe mwarangije amashuri yisumbuye abandi mwarangije Kaminuza. Mukwiye kujya mwegera baturage mukabigisha uko baboneza imirire, kubyara abo bashoboye kurera, no gusobanukirwa neza gahunda Leta ibagezaho zigamije kubafasha gutera imbere.”

Ari umuyobozi wa Polisi mu Ntara y’Amajyepfo ndetse n’umuyobozi wungirije mu Karere ka Huye bemereye uru rubyiruko kuruba hafi bakabagenera amahugurwa ku bintu bitandukanye.

Umuhuzabikorwa w’urubyiruko rw’abakorerabushake mu Karere ka Huye, Musangwamfura Emmanuel mu izina rya bagenzi be yishimiye ibiganiro bahawe yizeza abayobozi ko bagiye gushyira mu bikorwa ibyo bagiriwemo inama dore ko ibyinshi ngo bari basanzwe babikora.

Mu Karere ka Huye habarirwa urubyiruko rw’abakorerabushake ibihumbi bitanu. Ibi biganiro byari byitabiriwe n’urubyiruko rugera kuri 200 bahagaraiye abandi baturutse mu mirenge  14 igize akarere ka Huye.  

Ibiganiro nk’ibi Polisi y’u Rwanda irabikomereza mu tundi turere tugize Intara y’Amajyepfo, byose birakorwa hubahirizwa amabwiriza yo kurwanya ikwirakwira ry’icyorezo cya COVID-19.

Mu gihugu cyose habarirwa urubyiruko rw’abakorerabushake barenga ibihumbi 300. Ni bamwe mu bafatanyabikorwa ba Polisi y’u Rwanda mu bikorwa bitandukanye birimo umutekano n’ibindi bikorwa biteza imbere imibereho myiza y’abaturage.