Kinyarwanda
English
Abagize ihuriro ry’urubyiruko rw’abakorerabushake bo mu karere ka Huye na Kamonyi kuri uyu wa Kabiri tariki ya 23 Kamena bakoze ubukangurambaga bugamije kwigisha abaturage uko bakomeza kwirinda icyorezo cya COVID-19.
Mu karere ka Huye mu murenge wa Huye hari urubyiruko rugera kuri 38 ruhagarariye urundi. Aba bafasha abaturage kubahiriza amabwiriza yo kwirinda ikwirikwira ry’icyorezo cya COVID-19, barakangurira abaturage kwirinda kwegerana, kwambara neza agapfukamunwa, gukaraba mu ntoki n’amazi meza n’isabune, kwirinda gusuhuzanya bahana ibiganza. Ni igikorwa uru rubyiruko rurimo gufatanyamo na Polisi ndetse n’abayobozi mu nzego z’ibanze.
Kuru ruhande rwa Polisi y’u Rwanda hari Inspector of Police (IP) Leonille Mujawamariya n’umunyamabanga Nshingwabikorwa w’umurenge wa Huye, Rwamucyo Prosper.
Mu karere ka Kamonyi mu murenge wa Gacurabwenge, urubyiruko rw’abakorerabushake bafatanyije na Polisi bakanguriye abaturage bari baremye isoko rya Gashyushya uko bagomba kwirinda ikwirakwira ry’icyorezo cya COVID-19.
Abaturage bakanguriwe kujya bahana intera hagati yabo nibura metero imwe hagati y’umuntu n’undi, gukaraba mu mu ntoki kenshi gashoboka bakoresheje amazi meza n’isabune cyangwa umuti wabugenewe wica udukoko, kwirinda gusuhuzanya bahana ibiganza cyangwa bahoberana.
Abaturage banakanguriwe kwambara agapfukamunwa igihe cyose bari mu bantu benshi, kwihutira gutaha igihe cyose barangije guhaha mu rwego rwo kwirinda umuvundo mu isoko ndetse no kwirinda ingendo zitari ngombwa.
Ubwo hakorwaga ubu bukangurambaga, abantu bagera ku 100 bafatiwe mu isoko batambaye udupfukamunwa abandi batwambaye nabi. Abatadufite basabwe kutugura abandi barekwa uko tugomba kwambarwa.
Mu gihugu hose habarirwa urubyiruko rw’abakorerabushake barenga ibihumbi 300 (300,000), bakora ibikorwa bitandukanye cyane cyane byibanda ku kurwanya ibyaha no kubikumira bitaraba.
Bakora kandi ibikorwa birimo kuzamura imibereho myiza y’abaturage, ibikorwa by’amajyambere, kurwanya imirire mibi mu bana, kurengera ibidukikije batera ibiti, kubakira abatishoboye no kubaremera n’ibindi bitandukanye.
