Kinyarwanda
English
Itsinda ry’abapolisi b’u Rwanda bakora mu ishami ryayo ry’Ubuvuzi ryapimye ku buntu mu gihe cy’iminsi ine ubwandu bw’agakoko gatera SIDA abapolisi ndetse abafatanyabikorwa bayo mu kubungabunga umutekano bo mu karere ka Nyamagabe na Nyaruguru bagera kuri 458.
Abapimwe ni abagize urwego rwunganira akarere mu gucunga umutekano (District Administrative Security Support Organ -DASSO), Inkeragutabara, n’abafasha babo ndetse n’abapolisi bakorera ku cyicaro cya Polisi y’u Rwanda ikorera muri aka karere.
Iki gikorwa cyakozwe kuva ku itariki ya 23 Gicurasi kugera ku itariki ya 26 Gicurasi, kikaba cyarabereye ku biro by’imirenge yo muri utwo turere.
Mbere yo kubapima, abagize iri tsinda ryari riyobowe na Senior Supt. of Police (SSP) Elisé Rwihimba, babanzaga kwigisha ababaga bagiye guhabwa iriya serivisi, uko umuntu yandura akakoko gatera SIDA, uko bakwirinda ubwandu bwako, ndetse n’uko bakwirinda kukanduza abandi mu gihe basanga bagafite.
Mu byo bigishwaga harimo gukoresha agakingirizo mu gihe cyo gukora imibonano mpuzabitsina nka bumwe mu buryo bwo kwirinda kukandura cyangwa kukanduza abandi.
Bigishwaga kandi ubwoko bw’indwara zandurira mu mibonano mpuzabitsina,uko zandura, ndetse n’uko bazirinda.
Mu bindi babanzaga kwigishwa harimo uko Ebola, n’Umwijima byandura, uko bakwirinda kubyandura ndetse n’uko babigenza mu gihe babirwaye cyangwa uko bafasha ubirwaye.
