POLISI Y'U RWANDA

Polisi y'u Rwanda ku bufatanye n'abayobozi b'uturere mu Ntara y'Amajyepfo bagiranye ibiganiro n'abakora umurimo wo gutwara abagenzi kuri za Moto (Abamotari). Ibiganiro byabaye kuri uyu wa Gatatu tariki ya 04 Ugushyingo, bibera mu turere twose tugize intara y'Amajyepfo. Mu Karere ka Huye ibi biganiro byabereye muri sitade ya Huye, byatanzwe n'umuyobozi wa Polisi mu Ntara y'Amajyepfo, Chief Superintendent of Police (CSP) Innocent Kanyamihigo, yari kumwe n'umuyobozi w'akarere ka Huye, Ange Sebutege. Ibiganiro byitabiriwe n'abamotari bagera kuri 692.

Mu kiganiro cyatanzwe n'umuyobozi wa Polisi mu Ntara y'Amajyepfo, CSP Kanyamihigo yakanguriye abamotari kugira uruhare mu gukumira impanuka zikunze kugaragara mu mihanda. Yabasabye kujya bubahiriza amategeko uko yakabaye kuko biri mu nyungu z'ubuzima bwabo, abakoresha umuhanda n'igihugu muri rusange. 

Yagize ati "bamwe muri mwe iyo muri mu muhanda mutwaye, mukunze kurangwa n'imyitwarire itari myiza ndetse iteza impanuka. Hari abagenda bashyize telefoni mu ngofero mukagenda mwumva radiyo cyangwa muyivugiraho, hari abatwara banyoye inzoga, umuvuduko ukabije, kunyura kubinyabiziga munyuze iburyo, kutorohera abanyamaguru bambuka umuhanda n'ibindi bitandukanye."

CSP Kanyamihigo yagaye bamwe mu bamotari usanga batubahiriza ibimenyetso n'amategeko yo mu muhanda. Yakomoje kuri bamwe mu bamotari batubahiriza ya mirongo abanyamaguru baba bagomba kwambukiramo umuhanda ndetse n'amatara yo ku mihanda abasaba guhagarara umwanya muto. Yavuze ko hari abatabyubahiriza bakagonga abanyamaguru cyangwa bagakora andi makosa ashobora guteza impanuka zo mu muhanda. 

Umuyobozi wa Polisi mu Ntara y'Amajyepfo yibukije abamotari ko bafite uruhare runini mu kubungabunga umutekano w'igihugu bakumira ibyaha. 

Ati  "Hari bamwe muri mwe mukoreshwa mu gukora ibyaha. Hari abajya batwara abanyabyaha, gukwirakwiza ibiyobyabwenge, kwinjiza mu gihugu ibicuruzwa bya magendu n'ibindi bitandukanye. Hari ababikora batabizi hakaba n'abashukishwa amafaranga bakabikora babizi, icyo tubamenyesha ni uko iyo mubifatiwemo mubihanirwa nk'abafatanyacyaha."

CSP Kanyamihigo yasabye abamotari kujya bihutira gutangira amakuru ku gihe kugira ngo ibyaha bikumirwe hakiri kare. 

Umuyobozi w'akarere ka Huye, Ange Sebutege yakanguriye abamotari kujya bitabira ibikorwa by'iterambere ry'akarere n'igihugu muri rusange.

Yagize ati  "Leta yacu ndetse n'akarere dukorera ku mihigo, abamotari namwe kimwe nk'abandi baturage murasabwa ubufatanye mu ishyirwa mu bikorwa rya gahunda za Leta mu kwesa imihigo."

Yabasabye kwitabira gahunda ya Ejo heza, gutanga umusanzu mu bwisungane mu buzima (MUSA), umuganda, kugira isuku ku mubiri ndetse no kuri za moto zabo.

Nyuma y'ibiganiro abamotari bahawe umwanya batanga ibitekerezo.

Iyi nama yabaye hakurikijwe iyubahirizwa ry'amabwiriza yo kurwanya ikwirakwira ry'icyorezo cya COVID-19. Abamotari bibukijwe ko iki cyorezo kigihari basabwa gukomeza kubahiriza amabwiriza yose yo kucyirinda.

Umuyobozi w'imwe mu makoperative y'abamotari bakorera muri aka Karere ka Huye (CIM), Ngirumpatse Vedaste yashimiye ubuyobozi bwa Polisi n'ubw'akarere ka Huye ku nama babahaye biyemeza kuzazikurikiza. 

Mu Karere ka Huye habarirwa abamotari 1,376, bibumbiye mu makoperative abiri ariyo CIM na COTAMOHU. 

Ibi biganiro byabereye mu turere twose tugize intara y'Amajyepfo. Iyi ntara ibarirwamo abamotari 4,449.