POLISI Y'U RWANDA

Ku cyicaro gikuru cya Polisi y’u Rwanda ku Kacyiru, tanu tariki ya 12 Nzeri hasojwe amahugurwa y’abapolisikazi 162 abategurira gukora ibizamini bibemerera kujya mu butumwa  bw’amamhoro bw’umuryango w’abibumbye.

Umuyobozi ushinzwe ibikorwa bya Polisi Commissioner of Police (CP) Emmanuel Butera, yashimiye umuryango w’abibumbye kubera ubumenyi, ubunararibonye ndetse n’ubufasha impuguke zawo ziha abapolisikazi b’u Rwanda mu kuvuga neza indimi zikoreshwa mu butumwa bw’amahoro, kumenyera gutwara imodoka no gukoresha imbunda nto, ndetse n’abaterankunga baturutse mu gihugu cya Canada.

Akaba yagize ati:”Mu gihe mu Rwanda twashyize imbere iterambere ry’umwari n’umutegarugori, ubu ni uburyo bwiza ku bapolisikazi bacu gufata ubu bumenyi buzabafasha gutsinda ibizamini bibemerera kujya mu butumwa bw’amahoro bw’umuryango w’abibumbye”.

CP Butera akaba yashimye aba bapolisikazi kubera uko bitwaye mu gihe bamaze muri aya masomo, aboneraho n’umwanya wo kubasaba gukoresha neza aya mahugurwa babonye bagakuramo ubumenyi buzabafasha gutsinda ibizamini bibategereje.

Umwe mu barimu bigishije aba bapolisikazi Capitain  Garba Salama ukomoka muri Nigeria, yabashimiye uko bitwaye mu gihe cy’amasomo, dore ko batsinze amasomo yabo kuri 85%, bikaba bizabafasha gukora neza ibizamini byabo, akaba yagize ati:” Twashimishijwe n’ikinyabupfura, ukwitwararika n’ubunyamwuga aba bapolisikazi berekanye igihe cyose bamaze muri aya masomo”.

Captain Salama yanashimiye Polisi y’u Rwanda n’abayobozi bayo muri rusange, kuba barakoze ibishoboka byose amahugurwa akagenda neza ndetse bakanafashwa gusura bimwe mu bice binyuranye by’igihugu.

Uwavuze mu izina ry’abanyeshuri barangije amahugurwa, Assistant Inspector of Police (AIP) Alphonsine Murekatete yavuze ko ubu noneho biteguye neza kandi bakaba bizeye kuzatsinda ibizamini bibategereje.

Umuryango w’abibumbye wihaye gahunda yo kongera umubare w’abapolisi b’igitsinagore bajya mu butumwa bw’amahoro mu bihugu bitandukanye, ku buryo mu mpera za 2014 bazaba bagera kuri 20 ku ijana (20%).