POLISI Y'U RWANDA

Umuyobozi Mukuru ushinzwe ubugenzacyaha mu rwego rw'Igihugu rushinzwe ubugenzacyaha (RIB) Jean Marie Twagirayezu, kuri uyu wa Gatanu tariki ya 19 Kamena, yasoje ku mugaragaro amahugurwa yihariye yari agenewe abapolisi n’abagenzacyaha bazigisha abandi mu bihugu byabo ku bijyanye no kugenza ibyaha by'ihohoterwa rishingiye ku gitsina (SGBV).

Ni amahugurwa amaze iminsi 10 abera ku cyicaro gikuru cya Polisi ku Kacyiru, yitabiriwe na ba ofisiye 20 baturutse mu bihugu 9 bihuriye mu muryango uhuza Ingabo zihora ziteguye gutabara aho rukomeye mu Karere k’Afurika y’Iburasirazuba (EASF) aribyo; u Burundi, Ethiopia, Kenya, Djibouti, Somalia, Ibirwa bya Comores, Sudani, Uganda n’u Rwanda rwayakiriye, hagamijwe kongerera ubumenyi n’ubushobozi inzego z’umutekano muri Afurika y’Iburasirazuba mu rwego rwo kurandura burundu ihohotera rishingiye ku gitsina.

Umuyobozi mukuru ushinzwe ubugenzacyaha, yagarutse ku kamaro k’amahugurwa yo kuzigisha abandi n’icyo yitezweho mu gukumira no kurwanya ihohoterwa rishingiye ku gitsina muri Afurika y’Iburasirazuba ndetse no ku Isi muri rusange.

Yagize ati: “Mu izina ry’umuyobozi w’urwego rw’igihugu rw’Ubugenzacyaha mu Rwanda, ni iby’agaciro gakomeye kuri njye kuba turi kumwe muri uyu muhango wo gusoza aya mahugurwa yihariye ajyanye no kugenza ibyaha bishingiye ku ihohoterwa rishingiye ku gitsina. Ndabasaba kuzakoresha ubumenyi mwungukiye muri aya masomo mumazemo iminsi icumi kandi muzahugure neza abagenzacyaha bo mu bihugu mukomokamo mushingiye ku masomo mwigiye hano mu Rwanda.”

Twagirayezu yakomeje ashimira abayitabiriye umurava n’ubwitange bagaragaje mu gihe cy’amahugurwa, abasaba kuzaba abarimu beza, baha ubumenyi n’ubushobozi kubo bazahugura ku bijyanye n’ihohotera rishingiye ku gitsina kugira ngo babashe gukemura ibibazo no gusohoza neza inshingano bazaba bahawe.

Yasoje abibutsa ko amahugurwa afatwa nk’umusingi wo kunoza ingamba zo guhangana n’impinduka z’ibihungabanya umutekano, abasaba kuba intumwa zo kurwanya ihohoterwa iryariryo ryose mu bihugu byabo.

Uhagarariye umuyobozi mukuru w’ingabo zihora ziteguye gutabara aho rukomeye (EASF); Col. Melance Ntakiyiruta, yashimiye ubufatanye bw’ibihugu byitabiriye aya mahugurwa, anagaragaza uruhare rukomeye rwa Polisi mu kurwanya ihohotera rishingiye ku gitsina ndetse asaba abitabiriye amahugurwa kuzaba abarimu beza basangiza abandi ubumenyi bungukiye muri aya mahugurwa. 

Yagize ati: “Turashimira ubufatanye n’ubunyamwuga mwagaragaje muri aya mahugurwa, mu gihe abaturage bo mu bihugu byacu baba bugarijwe n’amakimbirane n’ihohoterwa rishingiye ku gitsina, Polisi ni rwo rwego rwa mbere rugira uruhare rukomeye mu kurwanya ayo makimbirane no gushimangira amahoro arambye. Iki ni ikimenyetso cy’ukuri cy’ubwitange bwo gukomeza gutuma ibihugu byanyu bihabwa agaciro mu muryango. Amasomo mwigiye hano muyasangize abandi, mukomeza kuzirikana ko agomba guhuza n’inshingano zanyu zo kurwanya ihohotera rishingiye ku gitsina.”

Yasoje ashimira igihugu cy'u Rwanda na Polisi muri rusange ndetse n’abapolisi baturutse mu gihugu cya Denmark babafashije kubigisha no kumva neza uko wakemura amakimbirane ashingiye ku ihohoterwa rishingiye ku gitsina. Yavuze ko ari ikimenyetso cy’ubufatanye buhoraho rufitanye n’umuryango w’ingabo z’Afurika y’Iburasirazuba zihora ziteguye gutabara aho rukomeye (EASF).

Mu gihe cy’iminsi icumi bamaze bahugurwa, bize amasomo atandukanye abaha ubumenyi mubijyanye n’ubugenzacyaha ku ihohoterwa iryariryo ryose cyane cyane irishingiye ku gitsina, guteza imbere ubunyamwuga ndetse no kuzaba abarimu beza bigisha abandi.