Mu ishuri rya Polisi y’u Rwanda rya Gishari riherereye mu karere ka Rwamagana ku itariki ya 10 Kanama, habereye umuhango wo gusoza amahugurwa ku banyeshuri  413 abashyira mu cyiciro cya ba Ofisiye bato muri Polisi y’u Rwanda. Bahawe  ipeti rya Assistant Inspector of Police ( AIP)  muri Polisi y’u Rwanda.

Ni mu muhango wayobowe na Minisitiri w’ubutabera akaba n’intumwa nkuru ya Leta Johnston Busingye ari kumwe n’abayobozi bakuru mu nzego za leta n’izumutekano barimo Minisitiri w’Ingabo Gen James Kabarebe, Minisitiri w’ubutegetsi bw’igihugu Francis Kaboneka, Umunyamabanga wa Leta muri Minisiteri y’ubutabera  Evode Uwizeyimana, Umuyobozi mukuru wa Polisi y’u Rwanda CG Emmanuel K. Gasana n’abandi bayobozi batandukanye muri polisi no mu zindi nzego zitandukanye.

Amahugurwa  yashojwe   yatangiwe n’abanyeshuri 419 batandatu muribo bakaba batarabashije kuyarangiza bitewe n’impamvu zitandukanye.

Minisitiri w’Ubutabera akaba n’intumwa nkuru ya Leta Johnston Busingye, wari umushyitsi mukuru muri uyu muhango, yasabye aba ofisiye bashya gushyira mungiro amasomo bigishijwe bibanda mu gukumira no kurwanya ibyaha by’ikoranabuhanga byugarije isi.

Yagize ati:” Muhereye ku nyigisho mwahawe ndetse n’uburere mwari musanganywe, ubu mufite byose byabafasha gucunga umutekano, uko igihugu gitera imbere abanyabyaha nabo barushaho gukataza bakora ibyaha bitandukanye; mukwiye namwe gukorana ubuhanga burushijeho kugirango mubashe guhangana n’ibyo byaha byugarije isi ndetse n’igihugu cyacu.’’

Minisitiri Busingye yakomeje  avuga ko Leta itazahwema gufasha Polisi hagamijwe ko umutekano w’abaturarwanda ukomeza kuba mwiza.

Yagize ati: ‘’ Leta izahora ibunganira mu kubaka ubushobozi bukenewe  binyuze mu nyigisho zitandukanye no kubaha ibikoresho bigezweho byo kubafasha kurangiza neza inshingano zanyu.’’

Minisitiri Busingye asoza, yashimiye ababyeyi uruhare bagize kugira ngo bahe uburere abana babo  bavuyemo ba Ofisiye babereye u Rwanda.

Yagize ati:’’ Turabashimira cyane uruhare mukomeza kugira mu buzima bwabo kuko  nirwo rutuma bashobora gukora akazi kabo neza n’imitima yabo iri hamwe kuko baba baziko namwe mubari inyuma.’’

Commissioner of Police ( CP) Vianney  Nshimiyimana, umuyobozi w’ishuri rya Polisi rya Gishari (PTS)  yavuze ko mu gihe cy’amezi 9 aba banyeshuri bamaze, bahawe inyigisho zitandukanye zibemerera kuzuza inshingano za ofisiye muto muri Polisi y’u Rwanda.

Yagize ati:’’ Ishuri rya Polisi rya Gishari, rifite inshingano zo gutanga inyigisho n’amahugurwa ku bapolisi b’u Rwanda hagamijwe kubongerera ubumenyi n’ubushobozi. Bize amasomo menshi arimo imiterere n’imirimo ya Polisi, ubuyobozi, gukorana n’abaturage, kubungabunga amahoro mu butumwa bw’umuryango w’abibumbye.

CP Nshimiyimana yakomeje avuga ko uretse amasomo ahabwa abazaba ba ofisiye bato, iri shuri ritanga amasomo ku byiciro bitandukanye hagamijwe kongerera ubumenyi abapolisi.

Aba  ofisiye 413 bashoje  bagize icyiciro cya 10 cya ba ofisiye bato muri Polisi y’u Rwanda   bamaze gutorezwa muri iri shuri.