POLISI Y'U RWANDA

Kuri uyu wa gatandatu tariki ya 28 Mata 2018, Polisi n’ Ingabo z’igihugu bafatanyirije hamwe n’abaturage batuye mu murenge wa Bumbogo, mu karere ka Gasabo igikorwa cy’umuganda rusange usoza ukwezi. Uyu muganda wahuje abaturage bo mu karere ka Gasabo n’abayobozi b’inzego z’ibanze basaga 2000 bakoze igikorwa cyo gutunganya umuhanda uva Birambo werekeza I Kinyinya warimo ubunyerere n’ibinogo byinshi byatewe n’imvura.

Bigeze ku musozo w’iki gikorwa, Umuyobozi ku rwego rw’akarere ka Gasabo, Murigande Benjamin yashimiye abawitabiriye ku bw’igikorwa cyakozwe, ashimira abapolisi n’abasirikari baje kwifatanya n’abaturage gusana uyu muhanda kugirango ibinyabiziga n’abagendesha amaguru babashe kuwukoresha nta mbogamizi.

Murigande yagize ati:’’Iki gikorwa kiratwereka neza ko, abantu bashyize hamwe bashobora kugera kuri byinshi mu gihe biyemeje gukora igikorwa icyo aricyo cyose giteza imbere inyungu rusange.’’

Yakomeje akangurira abaturage guhuza imbaraga mu kurwanya no gukumira inda ziterwa abangavu n’ibiyobyabwenge anasaba abatuye mu murenge wa Bumbogo kwita ku isuku n’isukura.

Yagize ati:’’Inda ziterwa abana b’abakobwa zitera ingaruka zitandukanye zirimo gucikisha amashuri ibyo bikabicira amahirwe yo kuzabasha kwifatira imyanzuro no kuzaba abaturage bashobora guhangana n’ubuzima bw’ejo hazaza.

Umuyobozi wa Polisi mu mujyi wa Kigali Assistant Commissioner of Police (ACP) Felly Rutagerura Bahizi, yashimiye abitabiriye igikorwa cy’umuganda ariko anabasaba cyanecyane urubyiruko kwirinda gukoresha ibiyobyabwenge, ahubwo bakihatira kujya batanga amakuru y’abo bakekaho kubyishoramo hagamijwe kugirango batabwe muri yombi.

Yagize ati:’’Ibiyobyabwenge byangiza umuntu mu bwenge no mu mitekerereze. Unywa ibiyobyabwenge ntashobora gutekereza neza cyangwa ngo agire umurimo  usaba imbaraga wamuteza imbere abasha gukora. Ibyo ahubwo bimutera gukora ibyaha birimo ubujura kugira ngo ashobore kubona amafaranga aguramo ibindi biyobyabwenge.’’

ACP Rutagerura yakomeje ashishikariza buri muntu kugira ibye kurwanya ibiyobyabwenge kugirango bibashe gucika burundu.

Yagize ati:’’Abantu bamwe mu bakuze kugirango bagure ibiyobyabwenge, bagurisha imwe mu mitungo y’urugo, bigakurura amakimbirane mu muryango cyane nk’iyo umwe mu bashakanye agerageje kubaza mugenzi we kuri iyo myitwarire igayitse.’’

Umwe mu baturage batuye mu mudugudu wa Gisasa wakorewemo umuganda, Ntamunsi Christopher yavuze ko atewe ibyishimo no kubona abagize inzego z’umutekano bifatanya n’abaturage mu gikorwa cy’umuganda.

Ntamunsi yagize ati:’’Nishimiye cyane kubona abagize inzego z'umutekano baza kwifatanya natwe abaturage mu gukora umuganda. Uyu muhanda mu minsi ishize ntiwari nyabagendwa, kubera ko nta moto cyangwa imodoka ntoya yabashaga kuwunyuramo, bitewe n’imivu yawangije ahantu hose ndetse n’amazu menshi arimo n’iyanjye aratenguka kubera imvura nyinshi cyane yaguye.’’