Kinyarwanda
English
Mu gitondo cyo kuri uyu wa Kabiri tariki 5 Ukuboza, ikipe ya Polisi y’u Rwanda ya Handball (Police HC) yahuye na Evergreen yo mu gihugu cya Uganda, iyitsinda bitayigoye ibitego 40 kuri 28.
Ni umukino wa kabiri ikipe ya Police HC itsinze mu irushanwa Mpuzamahanga rihuza amakipe yo mu Karere k’Afurika y’Iburasirazuba no hagati (ECAHF). ririrmo kubera i Nairobi muri Kenya.
Uyu mukino usa nk’uworoheye ikipe ya Police HC kuko igice cya mbere cyarangiye ifite ibitego 21 ku bitego 11 bya Evergreen, umukino ukarangira ishyizemo ikinyuranyo cy’ibitego 12 byose.
Umutoza wa Police HC; CIP (rtd) Antoine Ntabanganyimana, yavuze ko kuba batsinze uyu mukino bibashyize mu mibare myiza yo gutegura kujya muri kimwe cya kabiri cy’irushanwa, bityo ko umukino wa gatatu uzabahuza ejo tariki ya 6 Ukuboza, na Uganda Prison biteguye kuwitwaramo neza kugira ngo ikipe ibe yizeye itike yo gukomeza.”
Ikipe ya Police HC imaze kwegukana iri rushanwa inshuro 4 aho igikombe giheruka, yagitwaye mu mwaka wa 2021.
Kuri ubu iri mu itsinda ririmo ikipe ya Equity Bank yo muri Kenya na Evergreen yo muri Uganda yamaze gukuraho amanota, hamwe na GSU yo muri Kenya na Uganda Prison bagomba guhura mu mikino yo mu matsinda.
