Kinyarwanda
English
Igitego kimwe ikipe ya Police FC itsinze APR FC kiyihesheje kwegukana umwanya wa Gatatu. Ni umukino aya makipe yombi yahuriyemo kuri uyu wa 15 Nzeri 2019 kuri sitade Amahoro Remera.
Buri mwaka ubuyobozi bw'ikigega agaciro bategura irushanwa rihuza amakipe ane ya hano mu Rwanda akina mu cyiciro cya mbere.
Muri uyu mwaka iri rushanwa ryatangiye tariki ya 13 Nzeri, imikino yo guhatanira umwanya wa mbere, uwa kabiri n'uwa Gatatu yakinwe kuri uyu wa 15 Nzeri.
Ikipe ya Police FC na APR FC nizo zari guhatanira umwanya wa Gatatu, umukino watangiye saa saba amakipe yombi ubona ko anganya ingufu ariko Police FC igacishamo igasatira cyane ikipe ya APR FC.
Iminota 45 y'igice cya mbere yarangiye amakipe yombi anganya ubusa k'ubusa. Igice cya kabiri cyaranzwe no gusatira cyane ku ruhande rw'ikipe ya Police FC, iki gitutu cyatumye ibona igitego ku munota wa 72 gitsinzwe na Iyabivuze Osee n'umutwe nyuma y'ikosa ryari rihanwe na Nshuti Savio Dominique wari umaze gukinirwa nabi na Mutsinzi Ange ahagana muri koruneri.
Iminota 90 y'umukino yarinze irangira igitego kikiri kimwe k 'uruhande rwa Police FC.
Ikipe itsindiye umwanya wa Gatatu muri iri rushanwa ry 'agaciro ihabwa igihembo kingana n'amafaranga y'u Rwanda ibihumbi 500.
Umukino wa mbere utangira iri rushanwa tariki 13 Nzeri Police FC yari yatsinzwe na Rayon Sports nabwo habanje kwitabaza amapenaliti.
Ikipe ya Mukura VS niyo yegukanye iki gikombe nyuma yo gutsinda Rayon Sports ibitego bibiri kuri kimwe ihabwa miliyoni eshatu z’amafaranga y’u Rwanda (3,000,000 FRW), ikipe ya kabiri ihabwa miliyoni imwe n’igice (1,500,000 FRW).
