POLISI Y'U RWANDA

Mu rwego rwo gutsura umubano no guhana ubunararibonye hagati ya Polisi z’ibihugu byombi, kuri uyu wa gatatu tariki ya 16 Gicurasi, itsinda ry’intumwa ziturutse mu gihugu cya Angola ziyobowe na Minisitiri w’ibikorwa by’imbere mu gihugu Angelo De Barros Veigas Tavares zasuye Polisi y’u Rwanda.

Izi ntumwa zigeze ku cyicaro gikuru cya Polisi y’u Rwanda ku Kacyiru, zakiriwe n’Umuyobozi Mukuru wa Polisi y’u Rwanda (Inspector General of Police-IGP) Emmanuel K. Gasana ari kumwe n’Umuyobozi mukuru wa Polisi y’u Rwanda wungirije ushinzwe Imiyoborere n’imicungire y’abakozi (Deputy Inspector General of Police in charge of Administration and Personnel- DIGP/AP) Juvenal Marizamunda, n’abandi bayobozi batandukanye muri Polisi y’u Rwanda.

Mu biganiro bagiranye, IGP Gasana yabasobanuriye byimbitse uko Polisi y’u Rwanda yiyubatse kuva yashingwa mu 2000 kugeza ubu.

Mu ntumwa Minisitiri Tavares yari ayoboye zinarimo Umuyobozi mukuru wa Polisi y’Igihugu cya Angola Alfredo Edwardo Manuel Mingas n’Umuyobozi w’Urwego rw’Amagereza muri icyo gihugu Eugenio Pedro Alexandre, zikaba zishimiye ibyo Polisi y’u Rwanda imaze kugeraho mu gihe gito imaze ishinzwe, anavuga ko mu gihe cya vuba bazohereza itsinda ry’abapolisi bakuru bakaganira n’ubuyobozi bukuru bwa Polisi y’u Rwanda uko nabo bashyira mu bikorwa bimwe mu byiza basanganye Polisi y’u Rwanda.

Minisitiri Tavares yavuze ko intego y’uruzinduko rwabo mu Rwanda ari ugukingura imiryango y’umubano hagati ya Polisi z’ibihugu byombi, aho yagize ati:”Turizera nta shiti ko guhera ubu hagiye kubaho ingendo zitandukanye z’abayobozi muri Polisi zacu zombi, kugirango baganire uko bahana ubunararibonye ku kubungabunga umutekano w’abatuye ibihugu byacu byombi ndetse n’ibyabo. Igihugu cyacu nk’u Rwanda, nacyo cyaciye mu bihe bikomeye mu bihe byashize, ubu kikaba gishishikajwe no gutsura umubano n’ibihugu by’amahanga.”

Yakomeje avuga ati:”Nk’uko Isi igenda irushaho gutera imbere mu ikoranabuhanga, ni nako ibyaha bikorwa hifashishijwe ikoranabuhanga byiyongera, kubirwanya rero birasaba imikoranire myiza hagati ya Polisi z’ibihugu bitandukanye, zikabasha no kurwanya icuruzwa ry’ibiyobyabwenge, icuruzwa ry’abantu, iterabwoba, n’ibindi byaha byambukiranya imipaka.”

Yavuze kandi ati:”Imikoranire myiza ya Polisi z’ibihugu kandi, izanatuma habaho kurwanyiriza hamwe imitwe yitwaje intwaro ishobora gushaka guhungabanya umutekano w’ibihugu byacu. Ibi biradusaba rero gutera intambwe ikomeye mu kunoza iyo mikoranire.”

IGP Gasana yabwiye Minisitiri Tavares n’intumwa yari ayoboye ko Polisi y’u Rwanda iha agaciro gakomeye imikoranire myiza hagati ya Polisi z’ibihugu bitandukanye, kugirango bakemurire hamwe ibibazo by’umutekano muke ushobora kuvuka mu karere u Rwanda ruherereyemo by’umwihariko, no muri Afurika muri rusange.

Aha yavuze ati:”Turizera ko imikoranire myiza hagati ya Polisi z’ibihugu byacu byombi izatuma duhanahana ubunararibonye, kimwe n’uko Polisi y’igihugu kimwe hari ibyo izigira ku y’ikindi.”

Nyuma y’ibiganiro byahuje aba bayobozi, Minisitiri Tavares n’intumwa yari ayoboye batemberejwe amashami atandukanye ya Polisi y’u Rwanda, ari nako basobanurirwa imikorere yayo, aha twavuga Ishami rishinzwe kuzimya inkongi z’imiriro no gutabara abari mu kaga, Ikigo Isange One Stop Center, Laboratwari y’u Rwanda y’ibimenyetso bishingiye ku bumenyi n’ubuhanga bikoreshwa mu butabera, Hoteli icumbikira abapolisi bakorera ku cyicaro gikuru cyayo ku Kacyiru, nyuma yaho banasuye urwibutso rwa Jenoside rwa Kigali ruri ku Gisozi, aho bunamiye inzirakarengane z’Abatutsi zihashyinguye, aha hose akaba yari aherekejwe na IGP Gasana.

Mbere y’uko asura Polisi y’u Rwanda, Minisitiri Tavares n’intumwa yari ayoboye babanje kubonana na Minisitiri w’Ubutabera w’u Rwanda akaba n’Intumwa Nkuru ya Leta Johnston Busingye, aho baganiriye kuri Politiki z’ibihugu byombi.

Umubano w’u Rwanda na Angola wakomeje kuba mwiza kuva mu 2014, ubwo Minisitiri w’ububanyi n’Amahanga w’iki gihugu Georges Rebelo Chikoti yasuraga u Rwanda, icyo gihe akaba yaragiranye ibiganiro na Nyakubahwa Perezida w’u Rwanda Paul Kagame.

Mu mwaka wa 2015, u Rwanda rwafunguye Ambasade yarwo i Luanda muri Angola, ubu Ambasaderi w’u Rwanda muri Angola ni Alfred Kalisa.