POLISI Y'U RWANDA

Polisi y’u Rwanda irashima abatuye umurenge wa Kinyinya, mu karere ka Gasabo ku gikorwa cyo kwishakamo ubushobozi bakiyubakira Sitasiyo ya Polisi ifite agaciro ka Miliyoni 25 z’amafaranga y’u Rwanda.

Iyi Sitasiyo yubatse mu kagari ka Kagugu. Ifite Ibiro bitandatu birimo iby’Umuyobozi wayo, Kasho (iy’abagabo n’iy’abagore), aho abayigana bicara bategereje guhabwa serivisi, ubwiherero, n’ahabikwa ibikoresho.

Ku cyumweru tariki 23 Mata uyu mwaka, Umuyobozi Mukuru wa Polisi y’u Rwanda  wungirije ushinzwe ubutegetsi n’abakozi, DIGP Jevenal Marizamunda n’Umuyobozi w’aka karere, Steven Rwamurangwa bifatanyije n’amagana y’abaturage b’umurenge wa Kinyinya  gutaha iyo Sitasiyo bubatse mu gihe kigera ku mezi abiri.

Mu ijambo ry'ishimwe, DIGP Marizamunda yagize ati,"Igikorwa nk’iki cy’indashyikirwa kigaragaza ko nta cyo abashyize hamwe bafite intego n’umugambi byiza nta kibananira. Ibi bishimangira ubufatanye Polisi y’u Rwanda isanzwe ifitanye n’abaturage mu kubungabunga umutekano wabo n’ibyabo."

Yakomeje agira ati," Nk’uko Nyakubahwa Perezida wa Repubulika adahwema kutwibutsa ko ibibazo byacu ari twe ba mbere dushinzwe kubicyemura; abatuye Umurenge wa Kinyinya bagaragaje  ko basobanukiwe ko umutekano ari inkingi ya mwamba y’iterambere rirambye."

DIGP Marizamunda yijeje abatuye uyu murenge ko uzagana iyi Sitasiyo azahabwa serivisi nziza.

Yaboneyeho gusaba abatuye akarere ka Gasabo muri rusange kwirinda no gufatanya kurwanya ibyaha birimo ikoreshwa n’icuruzwa ry’ibiyobyabwenge, ubujura ubwo ari bwo bwose, impanuka zo mu muhanda n’ihohotera ririmo irishingiye ku gitsina n’irikorerwa abana.

Umuyobozi w'akarere ka Gasabo yabwiye abari aho ati,"Iki gikorwa cy'abaturage cyo kwiyubakira Sitasiyo ya Polisi kijyanye n’icyerekezo cy'Ubuyobozi Bukuru bw’igihugu cyacu cyo kwishakamo ibisubizo. Twihaye intego yo kubaka Sitasiyo ya Polisi mu mirenge yose igize akarere ka Gasabo. Iyi ya Kinyinya yiyongereye ku ya Gisozi twatashye umwaka ushize."

Yakomeje avuga ko ibikorwa nk’ibi by’abaturage byunganira ingengo y’imari y’akarere na gahunda za Leta muri rusange; bityo asaba abo mu yindi mirenge gutera ikirenge mu batuye umurenge wa Kinyinya.

Umwe mu batuye umurenge wa Kinyinya witwa Ntakirutimana Sadiki yagize ati,"Mu bihe bishize Polisi mu murenge wacu yakoreraga ahantu hatajyanye n'igihe. Twafashe icyemezo cyo kwishakamo ubushobozi bw'amafaranga tuyubakira aho ikorera heza; kandi buri wese yatanze uko yishoboye."

Undi witwa Baziruwabo Cyprien yunzemo agira ati,"Polisi ni iyacu. Ntitwakwemera ko iduhera serivisi ahantu hatajyanye n'igihe kandi ibyo ikora biri mu  nyungu zacu. Byabaye ngombwa ko twishakamo ubushobozi tuyubakira Sitasiyo nziza."

Iki gikorwa cyo gutaha ku mugaragaro Sitasiyo ya Polisi ya Kinyinya yubatswe n’abaturage cyitabiriwe n’abayobozi batandukanye barimo uyobora Polisi y’u Rwanda mu Mujyi wa Kigali, Assistant Commissioner of Police (ACP) Rogers Rutikanga n’Umunyamabanga Nshingwabikorwa w’umurenge wa Kinyinya, Umuhoza Rwabukumba.