POLISI Y'U RWANDA

Ni amahugurwa y’iminsi itanu  yatangiye kuri uyu wa 19 Kanama, ku cyicaro gikuru cya Polisi y’u Rwanda ku Kacyiru yitabirwa n’abapolisi 60 biganjemo ab’igitsina gore baturutse mu mashami atandukanye ya Polisi y’u Rwanda bazahugura abandi.

Aya mahugurwa yafunguwe ku mugaragaro n’umuyobozi wungirije wa Polisi y'u Rwanda ushinzwe imiyoborere n’abakozi DIGP Juvenal Marizamunda, intego yayo ni ukugira abapolisi basobanukiwe ihame ry’uburinganire ku buryo bazaryigisha mu mashami yose agize Polisi y’u Rwanda.

DIGP Juvenal Marizamunda yabwiye abitabiriye aya mahugurwa ko ataba amasigara cyicaro ahubwo ko akwiye kubafasha kwimakaza ihame ry’uburinganire.

Yagize ati “Ubumenyi muzakura muri aya mahugurwa mukwiye kubusangiza bagenzi banyu batari aha mu basobanurira ko uburinganire butaje guhanganya umugore n’umugabo ahubwo bwaje kubuzuzanya ndetse bugaha n’uburenganzira abana b’abakobwa bungana n’ubwa basaza babo.”

Yakomeje avuga ko uburinganire ari ubwuzuzanye hagati y’ibitsina byombi,iyo bushyizwe mu bikorwa bituma iterembere ry’umuryango n’iry’igihugu muri rusange ryihuta.
 
DIGP Marizamunda yasabye abari n’abategarugori b’abapolisi kugaragaza ubushobozi mu kazi kabo ka buri munsi.

Yagize ati “Mukwiye kugaragaza ubushobozi nk’ubwa basaza banyu kandi mwarabigaragaje,abari n’abategarugori mutanga umusanzu mu kugarura amahoro mu bihugu bitandukanye aho Polisi y’u Rwanda yohereje abapolisi mu butumwa bw’amahoro mu bihugu bitandukanye.”

Umuyobozi wa Polisi wungirije ushinzwe imiyoborere n’abakozi DIGP Marizamunda yasabye abapolisikazi kurangwa n’indangagaciro zo gukunda igihugu.  

Yagize ati” Gukunda igihugu hakubiyemo gukora akazi mutiganda,gutanga serivisi nziza ku baturage mushinzwe kurinda ,kwirinda ruswa n’ibindi byose bizatuma igihugu cyacu kiba indashyikirwa k’uruhando mpuzamahanga.”  

 Yasoje abasezeranya ko Polisi y’u Rwanda izahora ishyigikira  ihame ry’uburinganire.