POLISI Y'U RWANDA

Abanyeshuri biga mu kiburamwaka mu Ishuri rya SOS Children’s Villages riri mu murenge wa Kacyiru, mu karere ka Gasabo ku wa gatanu tariki 10 z’uku Kwezi bakoze urugendo shuri muri Polisi y’u Rwanda baganirirwa ku mikorere yayo.

Bageze ku cyicaro gikuru cya Polisi ku Kacyiru bakiriwe n’Umuyobozi w’Ishami ryayo rishinzwe kurwanya inkongi z’imiriro no gutabara abari mu kaga, Assistant Commissioner of Police (ACP) Jean Baptiste Seminega; akaba yari hamwe n’uwungirije Umuyobozi w’Ishami rya Polisi rishinzwe imikoranire yayo n’abaturage ndetse n’izindi nzego hagamijwe ubufatanye mu gukumira ibyaha, Chief Superintendent of Police (CSP) Rose Muhisoni.

ACP Seminega yaganirije abo banyeshuri ku gitera inkongi z’imiriro n’icyakorwa kugira ngo zirindwe .

Yababwiye ko mu bitera inkongi z'imiriro harimo gukoresha nabi ibikoresho bikoresha umuriro w’amashanyarazi n’ibikoresho by’amashanyarazi bitujuje ubuziranenge.

Abo bana bamaze kubwirwa ibitera inkongi z’imiriro beretswe uburyo bwo gusohoka mu nzu ifashwe n’inkongi; ndetse bakora umwitozo wo kuzimya inkongi y’umuriro.

Mu kiganiro n’abo banyeshuri, CSP Muhisoni yababwiye ko Polisi ishinzwe gukumira no kurwanya icyahunganya umutekano w’Abaturarwanda n’ibyabo; kandi ko kugira ngo isohoze izo nshingano ikorana n’izindi nzego n’abaturage.

Yagize ati,"Mu byo Polisi ikora harimo kurwanya no gukumira ubujura n’ihohotera rikorerwa abana nko kubakubita, kubaha ibihano biremereye ugereranyije n’ikosa bakoze, kubafata ku ngufu, kubacuruza no  kubata."

Yababwiye kandi ati," Nihagira umuntu ubahohotera mu buryo ubwo ari bwo bwose muzabimenyeshe ababyeyi cyangwa abarezi banyu kugira ngo babibwire Polisi ."

CSP Muhisoni yabwiye abarezi baherekeje abo banyeshuri muri urwo rugendo shuri ko igihe bamenye amakuru yerekeye ihohotera ryakorewe umwana bayamenyesha Polisi bahamagara nimero ya telefone itishyurwa 116.

Mu ijambo rye, Umuyobozi wa SOS Children’s Villages, Nduwimbabazi Marie Rose yagize ati," Twahisemo gusura Polisi kugira ngo abana bamenye uburenganzira bwabo n’uko babigenza igihe bahohotewe. Bigamije kandi kugira ngo bamenye imikorere ya Polisi nk’urwego rushinzwe kubungabunga umutekano w’Abaturage no kubakundisha igihugu bakiri bato."

Iyi ni inshuro ya kabiri abanyeshuri b’iri shuri basuye Polisi y’u Rwanda. Mu Ukwakira 2013 ni bwo bayisuye ku nshuro ya mbere.