POLISI Y'U RWANDA

Abatwara abagenzi kuri moto mu karere ka Gatsibo basabwe kwirinda gutunda ibiyobyabwenge no gutwara ababifite; ahubwo bagatanga amakuru  ku gihe atuma hafatwa ababyishoramo.

Ubu butumwa bwatanzwe n’Umuyobozi w’aka karere, Richard Gasana  afatanyije n’Umuyobozi wa Polisi y’u Rwanda muri aka karere, Superintendent of Police (SP) Eric Kabera mu nama bagiranye n’abakora uyu murimo (Abamotari) bagera kuri 500.

Ibiganiro bagiranye na bo byabereye ku biro by’aka karere biri mu murenge wa Kabarore. Byabanjirijwe n’igikorwa cyo kwangiza amakarito 214 ya Zebra Warage yafashwe mu mezi atatu ashize.

Muri icyo gikorwa cy’ubukangurambaga bwo kurwanya itundwa ry’ibiyobyabwenge, Polisi yashyikirije moto ebyiri ba nyirazo bazibwe ku itariki 22 Gashyantare uyu mwaka;  ziza gufatirwa mu murenge wa Katabagemu, mu karere ka Nyagatare ku munsi ukurikira uwo zibweho.

Ba nyirazo bazishyikirijwe ni Munyambabazi Aloys wari wibwe moto ifite nimero ziyiranga RD 402 F na Karekezi Gratien wari wibwe ifite nimero ziyiranga RD 050 P.

Aba bombi bashimye Polisi y’u Rwanda kuba yarafashe ikanabashyikiriza ibinyabiziga byabo  bari bibwe; bashimye n’abandi bagize uruhare mu ifatwa ry’izo moto zabo.

Mu butumwa yagejeje kuri abo batwara abagenzi kuri moto mu karere ka Gatsibo, Umuyobozi wako yababwiye ati,"Kunywa ibiyobyabwenge bigabanya ubushobozi bw’umuntu; bwaba ubw’umubiri ndetse n’ubwo gutekereza. Bitera kandi uburwayi butandukanye. Ibyo byose; kimwe n’izindi ngaruka bituma umuntu adakora ngo yiteze imbere; bityo ubukene bukamwugariza. Mwirinde kubitunda no guheka ababifite. Nimubikora muzaba mugize uruhare rukomeye mu kurwanya ikoreshwa, icuruzwa n’itundwa ryabyo."

SP Kabera yababwiye ko moto zikoreshwa mu gutunda iboyobyabwenge ku kigereranyo cya  90 % mu karere ka Gatsibo; kandi ko mu babikora harimo abakora umurimo wo kuzitwaraho abagenzi.

Yababwiye ko izo moto ebyiri zashyikirijwe ba nyirazo kuri uwo munsi zibwe na bamwe mu batunda ibiyobyabwenge bihimura ku bazikoreshaga mu gutwara abagenzi kubera batanze makuru yatumye Polisi ifata moto ifite nimero ziyiranga RD 769 B bari batwayeho amakarito ane ya Zebra Warage.

Yongeyeho ko Polisi yafashe uwitwa Nzakamwita Salim, alias Boss ucyekwaho kuba ari  mu bibye  izo moto ebyiri; akaba yarashyikirijwe Ubushinjacyaha.

SP Kabera yagize ati," Bamwe muri mwe bafatwa  bapakiye ibiyobyabwenge kuri moto; abandi bafatwa bahetse ababifite. Ababikora mubihagarike; kandi mutange amakuru y’abinangiye bagakomeza kubyishoramo.

Yibukije ko gukubita no gukomeretsa, gufata ku ngufu, gusambanya abana, ihohotera rishingiye ku gitsina, n’ibindi byaha bifitanye isano na byo bikorwa ahanini n’abanywi b’ibiyobyabwenge ; maze abasaba kuba abafatanyabikorwa mu kurwanya ikoreshwa ryabyo.