POLISI Y'U RWANDA

Nyakubahwa Perezida wa Repubulika y'u Rwanda, Paul Kagame, yazamuye mu ntera abapolisi 5746 ku mapeti atandukanye, barimo 10 bazamuwe mu cyiciro cya ba Komiseri bavuye mu cyiciro cya ba Ofisiye bakuru. 

Nk'uko bigaragara mu itangazo ryashyizwe ahagaragara ku wa Kane, tariki ya 9 Mata 2026,  abapolisi batanu (5) bo ku rwego rwa ba Komiseri bazamuwe ku ipeti rya Commissioner of Police (CP) bavuye ku ipeti rya Assistant Commissioner of Police (ACP) naho abapolisi 10 bazamurwa ku ipeti rya Assistant Commissioner of Police (ACP) bavuye ku ipeti rya Chief Superintendent of Police (CSP).

Abazamuwe  ku ipeti rya CSP bavuye ku ipeti rya Senior Superintendent of Police (SSP) nabo ni batanu mu gihe abapolisi 94 bazamuwe ku ipeti rya SSP bavuye ku ipeti rya Superintendent of Police (SP) naho abazamuwe ku ipeti rya SP bavuye ku ipeti rya Chief Inspector of Police (CIP) bakaba bagera ku 161.

Abapolisi bo ku rwego rwa ba ofisiye bato bazamuwe mu ntera ni 574 bazamuwe ku ipeti rya CIP bavuye ku ipeti rya Inspector of Police (IP), 17  bahabwa ipeti rya IP bavuye ku ipeti rya Assistant Inspector of Police (AIP)

Abapolisi bazamuwe mu ntera ku rwego rwa ba su-Ofisiye

Abapolisi 282 bahawe ipeti rya Chief Sergeant (C/Sgt) bavuye ku ipeti rya Senior Sergeant (S/Sgt), abapolisi 763 bahabwa ipeti rya S/Sgt bavuye ku ipeti rya Sergeant (Sgt), naho abapolisi 1886 bahabwa ipeti rya Sgt bavuye ku ipeti rya Corporal (Cpl), mu gihe abapolisi 1949 bahawe ipeti rya Cpl bavuye ku ipeti rya Police Constable (PC).

Abapolisi bazamuwe ku ipeti rya CP, barimo; Emmanuel Karasi, uyobora Ishami rya Polisi rishinzwe ubugenzuzi, imyitwarire n’imikorere y’abapolisi, Bertin Mutezintare, kuri ubu uyoboye itsinda ry’abapolisi bari mu bikorwa by'inzego z'umutekano z'u Rwanda (RSF) byo kurwanya iterabwoba muri Mozambique, Jean Nepomuscene Mbonyumuvunyi, uyobora ikigo cyigenga gishinzwe umutekano cya ISCO, Barthelemy Rugwizangoga, Komiseri w’Ishami rya Polisi rishinzwe amahugurwa na Fidele Mugengana uri mu butumwa bw'akazi hanze y'igihugu.

Abazamuwe ku ipeti rya ACP, barimo; Claude Bizimana, ushinzwe abakozi mu Ishami rya Polisi rishinzwe umutekano wo mu muhanda, Adolphe Nyagatare,  uri mu butumwa bw’akazi muri Leta zunze ubumwe z'Amerika, Rango Ndoli, Umuyobozi wungirije ushinzwe abakozi mu Ishami rya Polisi rishinzwe iperereza, Callixte Kalisa wungirije Umuyobozi wa Polisi mu Ntara y’Iburengerazuba, na Vincent Habintwari Bihigi, Umuyobozi Wungirije mu Ishami rishinzwe Umutekano wo mu muhanda.

Abandi bapolisi bahawe ipeti rya ACP kandi harimo; Antoine Munyampundu, Umwarimu mu ishuri rikuru rya Polisi y’u Rwanda (NPC), Faustin Kalimba, Umuyobozi w’ Ishami rya Polisi ryifashisha imbwa mu gucunga umutekano (Canine Brigade), Hodali Rwanyindo, Umuyobozi wungirije ushinzwe ibikorwa mu mutwe wa Polisi ushinzwe gutabara byihuse, Christian Safari, Umuhuzabikorwa ku rwego rw’igihugu w’urwego rwunganira uturere mu mutekano DASSO ndetse na Alexis Nyamwasa, Uyobora Ishami rya Polisi rishinzwe imari n’iterambere ry’ubushobozi bwa Polisi y’u Rwanda.