POLISI Y'U RWANDA

Perezida wa Repubulika y'u Rwanda, Nyakubahwa Paul Kagame, yazamuye mu ntera abapolisi 4516 ku mapeti atandukanye, barimo 16 bazamuwe mu cyiciro cya ba Komiseri bavuye mu cyiciro cya ba Ofisiye bakuru.

Itangazo rizamura mu ntera abapolisi ryasohotse kuri uyu wa Gatanu, tariki ya 25 Mata 2025, rigaragaza ko abapolisi 16 bazamuwe ku ipeti rya Assistant Commissioner of Police (ACP) bavuye ku ipeti rya Chief Superintendent of Police (CSP), 24 bazamurwa ku ipeti rya CSP bavuye ku ipeti rya Senior Superintendent of Police (SSP), mu gihe abapolisi 35 bazamuwe ku ipeti rya SSP bavuye ku ipeti rya Superintendent of Police (SP).

Abazamuwe ku ipeti rya SP bavuye ku ipeti rya Chief Inspector of Police (CIP) ni 63 , abazamuwe ku ipeti rya CIP bakaba ari 308 barimo 304 bavuye ku ipeti rya Inspector of Police (IP) na bane (04) bavuye ku ipeti rya Assistant Inspector of Police (AIP).

Abandi bapolisi bo ku rwego rwa ba ofisiye bato bazamuwe mu ntera ni 560 bari bari ku ipeti rya AIP bahawe ipeti rya IP mu gihe umupolisi umwe ari we wazamuwe ku ipeti rya AIP avuye ku ipeti rya Chief Sergeant (C/Sgt).

Abapolisi bazamuwe mu ntera ku rwego ba su-Ofisiye

Abapolisi 14 bahawe ipeti rya C/Sgt bavuye ku ipeti rya Senior Sergeant (S/Sgt), abapolisi 49 bahabwa ipeti rya S/Sgt bavuye ku ipeti rya Sergeant (Sgt), abapolisi 1345 bahawe ipeti rya Sgt bavuye ku ipeti rya Corporal (Cpl), naho abapolisi 2101 bahabwa ipeti rya Cpl bavuye ku ipeti rya Police Constable (PC).

Abazamuwe ku ipeti rya ACP, barimo; Athanase Nshuti, kuri ubu wungirije Umuyobozi wa Polisi (D/RPC) mu Mujyi wa Kigali,  Cornelle Murigo, uyoboye itsinda ry'Abapolisi bitegura kujya mu butumwa bw'Umuryango w'Abibumbye, Eric Kanyabuganza, uyobora Ishami rishinzwe amategeko muri Polisi y'u Rwanda na Fabien Musinguzi, Umuyobozi Mukuru Wungirije w'Ishami rishinzwe Umutekano wo mu muhanda, ushinzwe ibikorwa.

Abandi bapolisi bahawe ipeti rya ACP kandi harimo; Dr. Oreste Tuganeyezu, Umuyobozi w'ibitaro by'akarere bya Gisenyi, Methode Munyaneza, Umuyobozi wungirije w'ikigo gitangirwamo amahugurwa yo kurwanya iterabwoba (CTTC) i Mayange, Africa Sendahangarwa Apollo, Umuhuzabikorwa w'umuryango wa EAPCCO akaba n'Umuyobozi w'ibiro bya Polisi Mpuzamahanga (Interpol) mu Karere bikorera i Nairobi, Khalid Kabasha, Komiseri w'ishami rishinzwe ubutwererane na Porotokole, Peterson Mwesigye, uhagarariye Polisi y'u Rwanda mu muryango w'Abibumbye i New York na John Mulisa kuri ubu uri muri Mozambique mu bikorwa by'inzego z'umutekano z'u Rwanda (RSF) byo kurwanya iterabwoba.

Abapolisi 150 barimo ba ofisiye bato 45 na ba su-ofisiye 105 bashyizwe mu kiruhuko cy'izabukuru.

Hari kandi abapolisi 17 basezerewe ku mpamvu z'uburwayi na bane (04) basezerewe ku zindi mpamvu zitandukanye.