POLISI Y'U RWANDA

Kuri uyu wa gatanu tariki ya 20 Kamena, abapolisi b’u Rwanda 140 bari mu butumwa bw’amahoro bw’umuryango w’abibumbye mu mu ntara ya Gao mu gihugu cya Mali  (MINUSMA)bambitswe imidari yo kubashimira uko bakora akazi kabo neza ko kubungabunga amahoro muri iyo ntara.

Yambika abo bapolisi b’u Rwanda iyo midari, uyoboye abapolisi b’umuryango w’abibumbye bubahiriza amahoro muri Mali Mr Francisco Osler wari unahagarariye Umuryango w’Abibumbye, yavuze ko umuryango w’abibumbye wishimira uko abapolisi b’u Rwanda bakora akazi kabo neza mu bihugu byose bagiye kubahiriza no kubungabungamo amahoro, bakaba bahesha ishema u Rwanda.

Aha yagize ati:” Iyi midari mwambitswe, ni ikimenyetso cy’uko umuryango w’abibumbye (UN) wishimira ibikorwa byanyu by’indashyikirwa mwakoze kuva mwagera muri iyi ntara ya Gao no muri Mali muri rusange kugeza uyu munsi”.

Uhagarariye abapolisi b’u Rwanda bari muri Mali Chief Superitendent of Police (CSP) Bertin Mutezintare, yavuze ko abapolisi b’u Rwanda biyemeje kubahiriza no gushyira mu bikorwa intego z’abapolisi b’umuryango w’abibumbye bubahiriza amahoro muri Mali (MINUSMA) no mu bindi bihugu baba boherejwemo.

CSP Mutezintare yavuze ko “ Kubera amateka ya Jenoside u Rwanda rwanyuzemo, ntirushobora kurebera aho umutekano wahungabanye, kandi tugomba kwirinda ko hari ahandi hantu Jenoside yaba”.

Uku kwambikwa imidari bikaba byaratewe ahanini n’igikorwa abapolisi b’u Rwanda bakoze cyo kurinda abasivile n’intumwa z’umuryango w’abibumbye hagati y’itariki ya 16 na 21 Gicurasi ubwo inyeshyamba za MNRA zarwananga n’ingabo z’igihugu cya Mali.

Uyu muhango wo kwambika aba bapolisi b’u Rwanda bari mu butumwa bw’umuryango w’abibumbye muri Mali, wari wanitabiriwe n’abandi banyacyubahiro batandukanye barimo muyobozi wungirije w’uyoboye abapolisi b’umuryango w’abibumbye bubahiriza amahoro muri Mali, Umuyobozi w’intara ya Gao, bamwe mu bayobozi b’ingabo za Mali, abayobozi b’inzego z’ibanze muri Mali n’abaturage.