POLISI Y'U RWANDA

Abapolisi b’u Rwanda bari mu butumwa bwo kugarura no kubungabunga amahoro mu gihugu cya Haiti (Rwanda Formed Police Unit –RWAFPU HAITI 5), giherereye mu majyepfo y’umugabane w’Amerika n’abari mu cyo ku mugabane wa Afurika cya Central Africa Republic-CAR (United Nations Multidimensional Integrated Stabilization Mission in the Central African Republic - MINUSCA) bifatanyije ku itariki 7 Mata, 2015 n’abandi banyarwanda kwibuka ku nshuro ya 21 jenoside yakorewe Abatutsi muri 1994.

Muri Central Africa Republic, iki gikorwa cyitabiriwe n’abapolisi hamwe n’abasirikare b’u Rwanda  bari mu butumwa bwo kugarura no kubungabunga amahoro muri iki gihugu.

Abitabiriye uyu muhango  bacanye Urumuri ry’Icyizere  kandi bafata umunota wo kwibuka abazize jenoside yakorewe Abatutsi muri 1994.

Muri Haiti, uyu muhango wabanjirijwe n’urugendo rwo kwibuka miriyoni irenga y’Abatutsi bishwe muri jenoside, wabereye ku cyicaro cya RWAFPU HAITI 5 kiri mu mujyi wa Jeremie, ho mu ntara ya Grand Anse.

Intara ya Grand Anse yari ihagarariwe na Rosni Saint Louis muri uyu muhango witabiriwe kandi n’abapolisi baturuka mu bihugu bitandukanye bagize itsinda rishinzwe kugarura no kubungabunga amahoro muri iki gihugu (United Nations Stabilization Mission in Haiti -MINUSTAH), intumwa z’abapolisi baturuka mu gihugu cya Senegal bari muri ubu butumwa bw’amahoro, n’abaturage batuye mu gace uyu muhango wabereyemo.

Rosni yavuze ko igihugu cye cyibuka kandi giha agaciro miriyoni irenga y’Abatutsi bishwe muri jenoside kandi ko cyamaganye jenoside yakorewe Abatutsi muri 1994.

Yibajije impamvu  jenoside yakorewe Abatutsi muri 1994 yabaye Umuryango Mpuzamahanga urebera kugeza ubwo habura n’umuntu umwe mu bawugize utabara Abatutsi bishwe muri genoside ndetse n’Abatutsi bayirokotse.

Umuyobozi wa RWAFPU HAITI 5, Commissioner of Police (CP) Bruce Munyambo, yashimiye  abigomwe igihe cyabo maze bakaza kwifatanya n’abapolisi b’u Rwanda bari mu butumwa bw’amahoro muri iki gihugu kwibuka ku nshuro ya 21 jenoside yakorewe Abatutsi muri 1994.

Yashimiye by’umwihariko MINUSHAH, n’ubuyobozi bw’ibanze bw’agace RWAFPU HAITI 5 ikoreramo ku bufasha bwabyo mu itegurwa ry’iki gikorwa cyo kwibuka jenoside yakorewe Abatutsi muri 1994 cyabereye ku cyicaro cya RWAFPU HAITI 5. Yavuze ko jenoside yakorewe Abatutsi muri 1994 ifatwa nk’icyaha ndengakamere cyakorewe inyokomuntu mu mateka ya vuba ya muntu.

CP Munyambo yagize ati:"Abacu batuvuyemo tuzakomeza kubibuka mu rwego rwo kubasubiza icyubahiro bambuwe. Yakomeje agira ati n’ubwo u Rwanda rwanyuze muri ibyo bihe by’icuraburindi, rukomeje urugendo rw’ubwiyunge, kwiyubaka no kwiteza imbere kandi tuzakomeza gukorana na bagenzi bacu baturuka mu bice bitandukanye by’isi kubungabunga no kugarura amahoro nk’uko biri mu nshingano za MINUSTAH.

Muri uyu muhango, Padiri Mukuru wa Paruwasi y’umujyi wa Jeremie na Pasitoro wa Pentecostal Elie Church bayoboye amasengesho yo kwibuka Abatutsi bishwe muri jenoside naho korari Elie Shadai iririmba indirimbo zibibuka kandi zikomeza imitima y’abayirokotse.