Kinyarwanda
English
Abapolisi b’u Rwanda140 bari mu butumwa bwo kubungabunga amahoro muri Haiti itsinda rya gatanu (RWAFPU5) ku itariki ya 11 Kamena 2015,bambitswe imidari y’ishimwe y’Umuryango w’Abibumbye yo kubashimira uko bakomeje gukora neza akazi.
Mu gihe cyo kubambika iyo midari y’ishimwe, uhagarariye umunyamabanga mukuru wa ONU Sandra Honre, yagaragaje ibyishimo byinshi ubwo yabambikaga iyo midairi yishimwe, kubera kurangwa n’imyitwarire myiza bagaragaje muri iki gihe bamaze muri iki gihugu.
Yashimye ibikorwa by’abapolisi b’u Rwanda by’indashyikirwa, bashyira mu bikorwa inshingano zabo , ndetse u Rwanda rukaba ruri mu bihugu bya mbere bitanga umusanzu mu bikorwa byo kubungabunga amahoro hirya no hino ku isi.
Yagize ati” mu gihe mu Ntara ya Darfur muri Sudani habagaho ibibazo by’umutekano muke, u Rwanda rwabaye urwa mbere mu kujya gutabara no gufasha abaturage muri iyo ntara.
Sandra Honre yashimiye abapolisi b’u Rwanda bari muri ubwo butumwa bwo kubungabunga amahoro muri Haiti kubera ibikorwa byabo byo guhuza abaturage mu bikorwa bibateza imbere no kugira uruhare mu kwicungira umutekano.
Umuyobozi w’itsinda ry’abapolisi b’u Rwanda bari mu butumwa bwo kubungabunga amahoro muri Haiti Commissioner of Police (CP) Bruce Munyambo,yavuze ko bakora ibikorwa binyuranye birimo kurinda umutekano w’abakozi n’ibikoresho by’Umuryango w’Abibumbye ndetse bagacunga umutekano mu karere ka Grand Anse, bafasha n’abaturage mu by’ubuvuzi, ndetse bagakora n’umuganda bafatanyije n’abaturage.
Iri tsinda rya gatanu ry’abapolisi b’u Rwanda bari mu butumwa bwo kubungabunga amahoro muri Haiti rifasha n’abanyeshuri batishoboye ribaha ibikoresho by’ishuri no kubarihirira amafaranga y’ishuri , bafasha mu gukora no gusibura imihanda iba yarangiritse kubera ibihe by’imvura n’ibindi.
Bakaba bashimiwe ubunyamwuga bwabo mu kazi n’imyitwarire myiza, ubunyangamugayo ndetse n’izindi ndangagaciro zo kubana neza na bagenzi babo bo mu bindi bihugu bafatanya mu bikorwa byo kubungabunga amahoro muri Haiti.
Umuhango wo kwambika imidari y’ishimwe abapolisi b’u Rwanda bari mu butumwa bwo kubungabunga amahoro muri Haiti wari witabiriwe kandi n’umuyobozi w’intara ya Grand Anse Norman Weiner, uwungirije umuyobozi w’itsinda ry’abapolisi b’ibihugu byose biri muri ubwo butumwa Police Commissioner Moukaila Idrissou, uwungirije umuyobozi ushinzwe ibikorwa bya Polisi mu butumwa Col. Emmanuel Manisha, ndetse n’abakuriye amatsinda y’abapolisi bo mu bindi bihugu nabo bari muri ubwo butumwa bwo kubungabunga amahoro muri Haiti bo mu bihugu by’u Buhinde, Nepal, Bangladesh, Senegal, Jordan ndetse n’abanyarwanda baba muri iki gihugu cya Haiti bakora ibikorwa bitandukanye.
U Rwanda rwatangiye kohereza abapolisi barwo muri Haiti mu butumwa bwo kubungabunga amahoro guhera mu mwaka w’2010. U Rwanda rukaba rufite kugeza ubu abapolisi 600 mu butumwa bwo kubungabunga amahoro mu bihugu birindwi aribyo; Sudani, Sudani y’Amajyepfo, Liberia, Cote d’Ivoire, Haiti, Repubulika ya Centrafrika ndetse no mu ntara ya Abyei.
