POLISI Y'U RWANDA

Umutwe w’abapolisi b’u Rwanda bari mu butumwa bw’umuryango w’abibumbye bugamije kugarura amahoro mu gihugu cya Repubulika ya Centre Africa (MINUSCA), kuri uyu wa 7 Gicurasi watangije igikorwa cy’isuku n’isukura mu mujyi wa Bangui.

Aba bapolisi batanze amazi meza ku baturage b’ ahitwa Saint Paul I mu mujyi wa Bangui. Mu gihe cy’impeshyi ibice bimwe na bimwe by’umurwa mukuru Bangui bigira ikibazo cy’amazi meza ,bigatuma abaturage bakoresha amazi mabi abandi bagakora ingendo ndende bajya gushaka amazi meza.

Abari n’abategarugori bakora ingendo ndende bajya kuvoma bikaba byabaviramo guhura n’ihohotera rishingiye kugitsina.

Igikorwa cyo gutanga amazi meza k’ubaturage cy’itabiriwe n’abayobozi bakuru ba MUNISCA barimo Lt Col Farid Bouka na Lt Col Okogho Scholastique bo mu intsinda ry’ingabo za LONI z’ikorera i Bangui, abayobozi b’inzego z’ibanze n’abaturage bo muri uwo mujyi.

Patrice Mbalapo umuyobozi wa gace ka Saint Paul I yavuze ko ubufasha bahawe n’abapolisi b’u Rwanda bigaragaza umubano mwiza bafitanye n’abaturage .

Yagize ati “Turashima MINUSCA, by’umwihariko tugashima ubufasha twahawe n’abapolisi b’u Rwanda bari mu butumwa bw’amahoro, ibigega by’amazi byari byarakamye, twavomaga amazi y’ibirohwa yashoboraga kugira ingaruka k’ubuzima bwacu.”

Yakomeje avuga ko ibikorwa by’abapolisi b’u Rwanda birushaho kuzamura icyizere abaturage bagirira intumwa z’umuryango w’abibumbye zirimo kubungabunga amahoro muri icyo gihugu ariko cyane cyane abapolisi b’u Rwanda.

Umuyobozi w’uyu mutwe ushinzwe kurinda abayobozi, Protection Support Unit (PSU)Chief Supritendent of Police(CSP) Emmanuel Kabanda yavuze ko igikorwa cyo gutanga amazi meza kubaturage ba Saint Paul I cyari kigamije kongera imibereho myiza y’abaturage.

Yagize ati” umutekano urambye ntiwagerwaho mu gihe ntabufatanye buhari hagati y’abaturage n’inzego z’umutekano z'umuryango wa bibumbye,n’uwo mutekano ntiwashoboka abaturage bari mu bibazo , birakwiye gukorana n’abaturage kugira ngo babashe kwiteza imbere no gusohoka mu bibazo bibugarije.”

Protection Support Unit (PSU) ni umwe mu mitwe itatu igizwe n’abaPolisi b’u Rwanda 480 boherejwe mu butumwa bw’amahoro muri Centre Africa( MINISCA) ushinzwe kurinda abayobozi bo muri icyo gihugu ndetse n’abayobozi b’umuryango w’abibumbye.

Uyu mutwe ufite inshingano zo kurinda abayobozi bakuru barimo Minisitiri w’intebe,abayobozi bihariye bu muryango wa bibumbye muri iki gihugu ,abayobozi muri guverinoma n’abandi bafite imirimo yihariye.