Kinyarwanda
English
Ku wa Kane tariki ya 26 Kamena, abapolisi b’u Rwanda bagize itsinda RWAFPU3 riri mu butumwa bw’Umuryango w’Abibumbye bwo kubungabunga amahoro muri Sudani y’Epfo (UNMISS), bazindukiye mu gikorwa cyo gutanga ubuvuzi n’amazi meza ku baturage batishoboye barenga 500.
Ni igikorwa cyabereye mu mudugudu wa Amadi wo mu murwa mukuru Juba, ku bufatanye n’Ingabo z’u Rwanda ziri mu butumwa n’abagize umuryango w’abanyarwanda (Diaspora) batuye muri Sudani y’Epfo, mu rwego rwo guteza imbere ubuzima n’imibereho myiza y’abaturage.
Uretse ibikorwa by’ubuvuzi byakozwe kuva saa yine z’amanywa kugeza saa Kumi n’imwe z’umugoroba, abaturage banahawe amazi meza yo kwifashisha mu bikorwa by’isuku n’isukura, mu rwego rwo kurushaho guteza imbere imibereho myiza binyuze mu bufatanye busanzwe hagati y’inzego z’umutekano z’u Rwanda n’abaturage bashinzwe gucungira umutekano.
Umuyobozi w’umudugudu wa Amadi, Laat Gatluak, yashimye umubano mwiza uri hagati y’inzego z’umutekano z’u Rwanda zihagarariwe mu butumwa bw’amahoro muri Sudani y’Epfo n’abaturage baho, agaragaza ko bashyigikiye ibikorwa bitandukanye bakora bifasha abaturage mu iterambere ry’ubukungu n’imibereho myiza, byiyongera ku nshingano bafite zitoroshye zo kubacungira umutekano.
U Rwanda rwatangiye kohereza abapolisi mu butumwa bwo kubungabunga amahoro muri Sudani y’Epfo mu mwaka wa 2015, aho kuri ubu habarizwa amatsinda abiri y’abapolisi bakorera i Juba mu murwa mukuru n’ahitwa Malakal mu ntara ya Upper-Nile.
