Kinyarwanda
English
Kuri uyu wa Gatandatu tariki ya 7 Werurwe, Polisi y’u Rwanda yifatanyije n’inzego z’ibanze, urubyiruko rw’abakorerabushake n’abaturage bo mu murenge wa Kinyinya mu Karere ka Gasabo, mu muganda udasanzwe wahariwe abagore mu rwego rwo kwitegura umunsi mpuzamahanga w’umugore wizihizwa ku wa 8 Werurwe buri mwaka.
Ni umuganda wabereye ku kigo cy’amashuri cya Rwankuba, cyatoranyijwe mu bigo bizubakirwa ibyumba by’amashuri mu bikorwa by'ubufatanye bw'Ingabo na Polisi by'u Rwanda n'abaturage muri uyu mwaka wa 2026, hagamijwe gufasha abaturage mu bikorwa by’iterambere n'imibereho myiza.
Mu bikorwa byaranze uyu muganda rusange harimo gusiza no gutunganya ikibanza kizubakwamo ibyumba 15 ku Rwunge rw’amashuri rwa Rwankuba, ikigo cyagiraga ubucucike bukabije bigatuma abana batiga neza.
Witabiriwe n'abayobozi batandukanye barimo Umuyobozi w’ishami rya Polisi rishinzwe guhuza ibikorwa bya Polisi n’abaturage, Assistant Commissioner of Police (ACP) Teddy Ruyenzi, Umuyobozi Nshingwabikorwa wungirije w'akarere ka Gasabo, Regis Mudaheranwa n’abo mu zindi nzego z'umutekano.
ACP Ruyenzi yashimiye abitabiriye umuganda avuga ko iterambere rigerwaho ari uko habayeho ubufatanye kandi buri wese akabigiramo uruhare.
Yagize ati: ‘‘Iterambere ry’igihugu ntiryagerwaho hatabayeho ubufatanye bw'inzego zose n'abaturage by’umwihariko. Abagize ihuriro ry'urubyiruko rw’Abakorerabushake bafatanya n’abagize inzego z’umutekano mu kubaka igihugu kandi uruhare rwabo rukaba rugaragarira buri wese.’’
ACP Ruyenzi yashimiye abitabiriye iki gikorwa cyo gukora umuganda, abibutsa ko kubahiriza gahunda za Leta ari ngombwa, kandi yizeza ko hazakomeza kubaho ubufatanye muri byose n'abaturage b’umurenge wa Kinyinya.
Umuyobozi Nshingwabikorwa wungirije w'Akarere ka Gasabo, bwana Regis Mudaheranwa yashimiye abaturage b’Akarere ayobora bitabiriye iki gikorwa cy’umuganda, avuga ko iki kigo cy’amashuri cyatoranyijwe gufashwa kongererwa ibyumba by’amashuri kubera ko hakunze kugaragaramo ubucucike bw’abanyeshuri biga muri iri shuri.
Yasabye abaturage kuzafata neza ibyumba by’amashuri igihe amashuri azaba amaze kuzura kuko aribo ishuri rizagirira akamaro.
