Kinyarwanda
English
Kuri uyu wa Kane tariki ya 23 Nyakanga, abapolisi b'u Rwanda 209 basoje amahugurwa ajyanye no kurinda abanyacyubahiro, guhangana n’ibyihebe mu bice by’imijyi, guhosha imyigaragambyo no kugarura ituze muri rubanda (VIP Protection, Urban Combat, and Riot Control courses).
Aya mahugurwa yateguwe ku bufatanye n’Urwego rushinzwe umutekano w’imbere mu gihugu cya Qatar (Lekhwiya), yari amaze ibyumweru bitandatu abera mu Kigo cya Polisi gitangirwamo amahugurwa yo kurwanya iterabwoba (CTTC) giherereye i Mayange mu Karere ka Bugesera.
Umuhango wo gusoza aya mahugurwa ku mugaragaro wayobowe n’Umuyobozi Mukuru wa Polisi y’u Rwanda wungirije ushinzwe ibikorwa (DIGP), CP Vincent Sano, ari kumwe n’uhagarariye itsinda rya Lekhwiya ya Qatar; Major Nassar Khalid.
Ni amahugurwa yatanzwe mu byiciro bitatu bigizwe no kurinda abanyacyubahiro, guhangana n’ibyihebe mu bice by’imijyi, guhosha imyigaragambyo no kugarura ituze muri rubanda. Yateguwe mu rwego rwo kongerera ubumenyi n'ubushobozi abayitabiriye mu kazi ko kurinda abanyacyubahiro, kurwanira mu mujyi ndetse no guhosha imyigaragambyo.
DIGP Sano yashimiye uburyo aya mahugurwa yateguwe kandi agakorwa neza mu buryo bwa kinyamwuga bigizwemwo uruhare n'ubufatanye busanzwe hagati y'ibihugu byombi.
Yagize ati: “Mbere na mbere, ndifuza gushimira mbikuye ku mutima ubuyobozi bwa Repubulika y'u Rwanda n'ubwa Leta ya Qatar ku bw'ubufatanye bwiza kandi bukomeje kuranga ibihugu byombi, bukanashimangira imikoranire hagati y'inzego zacu zishinzwe umutekano. Ubu bufatanye burambye bwatumye icyerekezo cy'abayobozi bacu gihindurwa ibikorwa bifatika bigamije guteza imbere amahoro, umutekano n'ubunyamwuga.”
Yakomeje agira ati: “Ndashimira kandi byimazeyo ubuyobozi bwa Polisi y'u Rwanda n’Urwego rushinzwe umutekano w’imbere muri Leta ya Qatar (Lekhwiya), ku bw'ubwitange budasanzwe mukomeje kugaragaza mu kongerera ubushobozi abapolisi bacu. Inkunga mukomeje kuduha igaragaza ubukomezi bw'ubufatanye bwacu ndetse n'icyerekezo duhuriyeho cyo gutegura neza abapolisi bacu kugira ngo bashobore guhangana n'ibibazo by'umutekano bigenda bihinduka kandi birushaho gukomera muri iki gihe. Ubumenyi abarimu mwatanze bwazamuye ku buryo bugaragara ubushobozi bw'abapolisi bacu mu kazi ka buri munsi, kandi ndizera ko buzakomeza kugaragarira mu mikorere yabo no mu rwego rw'imikoranire myiza n’abaturage.”
CP Sano yashimiye abapolisi basoje aya mahugurwa ubwitange, imyitwarire myiza n'umuhate wabaranze bakayasoza neza. Yabashishikarije gushyira mu bikorwa ubumenyi n'ubushobozi bungutse, bakarangwa n'ubunyamwuga, ubunyangamugayo n'ubwitange mu nshingano za bo za buri munsi. Yavuze ko Polisi y'u Rwanda izakomeza gushyira imbaraga mu guteza imbere ubumenyi n'ubushobozi bw'abapolisi kugira ngo bakomeze kwitegura neza guhangana n'ibibazo bishya by'umutekano.
Umuyobozi w’ikigo cya CTTC Mayange, Commissioner of Police (CP) William Kayitare, yashimiye abanyeshuri umurava bagaragaje abifuruza ishya n’ihirwe, anabibutsa ko kurangiza aya mahugurwa ari intangiriro y’urugendo n’inshingano zisumbuyeho zibategereje mu kazi bityo ko bakwiye gukomeza kuzirikana ibyo bize barushaho kwiyungura ubumenye.
Muri aya mahugurwa y’ibyiciro bitatu abayitabiriye bungukiyemo ubumenyi mu kurinda abanyacyubahiro, kurwanira mu mujyi bahanganye n’ibyihebe byihishe mu mazu, guca intege abagizi ba nabi, kurasa badahusha, guhosha imyigaragambyo no kugarura ituze muri rubanda.
