POLISI Y'U RWANDA

Mu rwego rwo kongera ubumenyi muri iki gihe cy’amasomo yabo,  abanyeshuri  bo mu Ishuri rikuru rya Polisi y’u Rwanda (NPC) biga  ibijyanye n’imiyoborere n’imicungire y’abakozi mu buryo bwa  gipolisi ndetse  bakaba bari hafi kurangiza icyiciro cya gatatu cya kaminuza mu bijyanye no kwimakaza umuco w’amahoro no gukemura amakimbirane, bari mu rugendo shuri hirya no hino mu gihugu guhera taliki ya 8 Kamena 2015. Aba bapolisi bakuru 30 baturutse mu bihugu umunani bikurikira: Burundi, Ethiopia, Gambia, Kenya, Namibia, South Sudan, Uganda n’u Rwanda ari narwo ruyategura.

Mu ntangiriro z’urugendo rwabo tariki ya 8 kamena, basuye ibigo bitandukanye  birimo  Ikigo cy’Igihugu gishinzwe  Imiyoborere(RGB), Minisiteri Ishinzwe Umuryango w’Ibihugu by’Afurika y’Iburasirazuba (MINEAC), Komisiyo y’Igihugu y’Ubumwe n’Ubwiyunge(NURC) ndetse n’ikigo cya Isange One Stop Center kiri ku bitaro bya Polisi y’u Rwanda ku Kacyiru. Ku munsi wabo wa kabiri tariki ya 9 Kamena,basuye Minisiteri ishinzwe gucyura impunzi no kurwanya Ibiza.

Impuguke mu kurwanya no gukumira Ibiza Habinshuti Philippe yaganiriye n’abo banyeshuri byinshi ku biza, ibibitera, ingamba ndetse n’uruhare rwa buri wese n’inzego zitandukanye mu kubikumira no kubirwanya.  Banasuye kandi ikigo cy’igihugu gishinzwe iterambere (RDB) bakaba barasobanuriwe ibyo u Rwanda rukora mu kureshya abashoramari mu iterambere ritandukanye ndetse no korohereza abandi bifuza gushora imari mu Rwanda.

Ku itariki ya 10 Kamena 2015, abo bapolisi bakaba barasuye uruganda rukora amakaro ruherereye mu karere ka Nyagatare, aho umuyobozi warwo Kipala DALAUSE yabasobanuriye imikorere y’urwo ruganda ndetse n’uruhare rwarwo mu guteza imbere imibereho y’abaturiye urwo ruganda no kugira uruhare mu guteza imbere igihug muri rusange.

Banasuye kandi uruganda rwa Inyange mu karere ka Kicukiro bakaba barakiriwe n’umuyobozi warwo  Gakwaya Charles nawe akaba yarabasobanuriye imikorere y’urwo ruganda n’uruhare rwarwo mu iterambere ry’icyo gihugu.

Ubuyobozi bw’iri shuri bukaba butangaza ko impamvu y’uru rugendoshuri, ari uguhuza no kumenya isano riri hagati y’umutekano igihugu cyacu kimaze kugeraho nyuma ya jenoside yakorewe Abatutsi mu mwaka w’1994 ndetse n’iterambere mu nzego zitandukanye riri mu gihugu. Abo bapolisi bakaba basura inganda zitandukanye hagamijwe kureba uruhare umutekano ufite muri iryo terambere kuko habaho iterambere mu gihe igihugu gifite umutekano usesuye.

Biteganyijwe kandi ko izi ngendoshuri barimo gukorera mu gihugu imbere, nibazirangiza, aba bapolisi bazazikomereza no hanze y’u Rwanda mu minsi iri imbere  mu bihugu bya Kenya na Namibiya.