Kinyarwanda
English
Abapolisi b’u Rwanda babiri bo ku rwego rwa ba ofisiye, kuri uyu wa Kabiri tariki ya 28 Nyakanga, basoje amasomo y’icyiciro cyisumbuye bari bamazemo imyaka ibiri mu Butaliyani, mu Ishuri Rikuru ry’aba Ofisiye rya Carabinieri (Carabinieri Officers School) riherereye mu mujyi wa Roma mu Butaliyani.
Abasoje amasomo ni Inspector of Police (IP) Caleb Turatsinze na Assistant Inspector of Police (AIP) Ezechiel Ntirenganya, bakaba barize amasomo atandukanye arimo; amategeko, gukora iperereza n’ubumenyi bwihariye bwa kinyamwuga mu kazi.
Umuhango wo gusoza aya masomo y'icyiciro cya 07 yari amaze imyaka ibiri (2), wayobowe n’Umuyobozi w’amashuri ya Carabinieri, Lt Gen Marco Minicucci, ukaba wanitabiriwe n’uhagarariye inyungu z’u Rwanda mu gihugu cy’Ubutaliyani, Hon Enrico Lalia Morra.
Polisi y'u Rwanda na Carabiniere bashyize umukono ku masezerano y’ubufatanye mu mwaka wa 2017, hagamijwe guteza imbere ubufatanye mu kubaka ubushobozi, kurwanya no guhangana n’ibyaha bitandukanye ndetse no kubaka amahoro arambye.
Kuva icyo gihe hatangiye umubano ukomeye mu iterambere ry’ubushobozi nko mu bikorwa byo kugarura amahoro hirya no hino ku isi, kurwanya iterabwoba, gucunga umutekano w’ibibuga by’indege, gucunga umutekano n’ituze rusange, kurinda abayobozi bakuru, kurwanya ibyaha by’ikoranabuhanga, gucunga umutekano wo mu muhanda, kurengera ibidukikije n’ibindi.
