Kinyarwanda
English
Abapolisi 68 barimo 50 b’abagenzacyaha bakorera ahantu hatandukanye mu gihugu n’abandi 18 barimo abayobozi ba sitasiyo za Polisi zo mu mujyi wa Kigali, abakora mu ishami rya Polisi y’u Rwanda rishinzwe imicungire y’ibikoresho, abakora imirimo yo gupima ibimenyetso by’icyaha , n’abakora muri serivisi z’ubuvuzi,ku itariki 5 Kamena, bashoje amahugurwa ajyanye no gufatanya mu gukora iperereza hagamijwe guha ubutabera Abaturarwanda. Aya mahugurwa yabereye ku cyicaro gikuru cya Polisi y’u Rwanda ku Kacyiru yatangiye ku itariki 2 Kamena.
Yasojwe ku mugaragaro n’Umuyobozi w’Ishami rya Polisi y’u Rwanda rishinzwe gusezerera no gusubiza mu buzima busanzwe Abapolisi, Commissioner of Police (CP), Cyprien Gatete,akaba yari hamwe n’abandi ba ofisiye bakuru ba Polisi y’u Rwanda barimo Umuyobozi w’Ishami ryayo ry’Ubugenzacyaha, Assistant Commissioner of Police (ACP) Theos Badege.
Mu byo bigishijwe harimo uburyo bwo kuzitira no kurinda ahabereye icyaha kugirango hatangira umuntu utabyemerewe uhinjira akaba yakwangiza ibimwenyetso byacyo, gukusanya ibimenyetso byacyo, no gukora iperereza ku cyaha cyakozwe kugeza igihe dosiye igerejwe mu bushinjacyaha.
Bigishijwe kandi uburyo bwo kubaza abakekwaho gukora icyaha, imifungire n’uburenganzira bw’ukurikiranyweho gukora icyaha, imikoranire hagati y’abagenzacyaha n’izindi nzego zifite ubutabera mu nshingano, imbogamizi abagenzacyaha bahura na zo mu gihe bakora iperereza n’uburyo bazikemura.
Bariya 18 bayitabiriye kuva ku itariki 4 Kamena, bakaba bariyongeraga kuri bariya bagenzacyaha 50 kugirango bahugurirwe hamwe nabo, dore ko imirimo y’abo ifite aho ihurira n’inshingano z’aba bagenzacyaha.
Ayo mahugurwa yasojwe abayakoze bakora umwitozo wo kwimenyereza gushyira mu bikorwa ibyo bigishijwe.
CP Gatete yabwiye abayashoje kuzashyira mu bikorwa ubumenyi bungutse no kuzabusangiza bagenzi babo bakorana.
ACP Badege yasobanuye ko aya mahugurwa ari mu byo Polisi y’u Rwanda yashyize imbere hagamijwe kongerera ubumenyi abapolisi mu ngeri zitandukanye bubashoboza kurushaho kuba abanyamwuga, bityo bashobore gusohoza inshingano zabo neza.
