POLISI Y'U RWANDA

Mu gitondo cyo kuri uyu wa gatatu tariki ya 8 Nyakanga 2015, itsinda ry’abapolisi (FPU) 140 barimo ab’igitsinagore 17 bagarutse mu Rwanda, bakaba bari bamaze umwaka mu gihugu cya Haiti, aho bari baragiye kubungabunga amahoro n’umutekano mu butumwa bwa Loni buzwi nka MINUSTAH, rikaba ari itsinda ryari ryaragiye ari irya gatanu (FPU 5)mu gihugu cya Haiti.

Kuri uyu wa mbere ku mugoroba, hakaba haragiye irindi tsinda rya gatandatu rigiye gusimbura iri, rikaba ryari rigizwe n’abapolisi bagera ku 160.

Bageze ku kibuga cy’indege mpuzamahanga cya Kigali i Kanombe, bakiriwe n’umuyobozi mukuru wa Polisi wungirije ushinzwe ubutegetsi n’abakozi muri Polisi y’u Rwanda DIGP/AP Juvenal Marizamunda, ashima uko aba bapolisi bitwaye  neza aho bari baragiye guhagararira u Rwanda, bakaba barabaye intangarugero mu gufasha abaturage mu bikorwa binyuranye byo kubabungabungira umutekano n’ibindi birebana no gufasha abatishoboye, byose bagaragaza ubunyamwuga.

Akaba yagize ati:” Aba bapolisi bagarukanye imidari y’ishimwe kubera ukuntu bakoze neza akazi kari kabajyanye, kandi bakaba basize bubatse umuco mwiza mu gihugu bavuyemo, aho bafashije mu buryo butandukanye abatishoboye n’abatagira kivurira, cyane cyane imfumbyi”.

Yakomeje abifuriza ikaze mu gihugu cyabo muri rusange no mu kazi kabo by’umwihariko, aho yababwiye ko Polisi y’u Rwanda nayo yiyubatse mu nzego zose z’imirimo yayo igihe batari bahari, bityo basabwa kuzagendera ku muvuduko nk’uw’abandi igihe bazasubirira mu kazi.

Uwari uyoboye aba bapolisi bagarutse mu Rwanda Commissionner of Police (CP) Bruce Munyambo, yavuze ko bishimira uko bakoze akazi kabo neza, aho yagize ati: “Tuvuyeyo abanyagihugu ba Haiti badushima dore ko twagize uruhare mu bikorwa byinshi, haba ibyo kurinda umutekano w’abaturage, ibikorwaremezo byaba ibya Leta ndetse n’ibya Loni ihakorera.Twakoze kandi ibikorwa bizamura imibereho myiza y’abaturage ndetse n’ibijyanye no kurinda ibidukikije n’ibikorwa by’umuganda, ibi tukaba twarabiherewe n’umudari w’ishimwe.”

Yavuze ko kuba baragize uruhare mu guteza imbere imibereho myiza y’abaturage b’igihugu cya Haiti, byatumye n’abayobozi b’inzego z’umutekano muri icyo gihugu bagira ibikorwa bakora byo gufasha no guteza imbere abatishoboye.

Haiti  ni kimwe mu bihugu abapolisi b’u Rwanda bari kubungabunga mo amahoro, ahandi bari ni mu ntara ya Darfur, Sudani y’Amajyepfo, Cote d’Ivoire,Mali, Liberia, Centrafrique, Guinea Bissau no mu ntara ya Abyei.

Kugeza ubu abapolisi b’u Rwanda bari mu butumwa bw’amahoro bose hamwe bakaba ari 525.

Kuba u Rwanda rujya kubungabunga amahoro n’umutekano mu bihugu birangwamo amakimbirane biri mu itegeko nshinga rya Repubulika y’u Rwanda kuva mu 1994, nyuma y’aho Umuryango mpuzamahanga unaniriwe gutabara u Rwanda muri jenoside yakorerwaga abatutsi; Polisi y’u Rwanda ikaba ihora yiteguye gutabara no kugarura amahoro mu bindi bihugu birimo amakimbirane byayitabaza.