POLISI Y'U RWANDA

Abanyeshuri bo mu bigo by’amashuri yisumbuye byo mu turere twa Musanze na Rutsiro bashyizeho amahuriro yo kurwanya ibyaha (Anti-crime Clubs) bakaba bayaganiriramo ndetse bakayafatiramo ingamba z’uko bagira uruhare mu kubumbatira no gusigasira umutekano.

Mu minsi ishize, amagana y’abanyeshuri bo mu Rwunge rw’amashuri rwa Rugali ruherereye mu murenge wa Rwaza, ho mu karere ka Musanze bashyizeho amahuriro abiri yo kurwanya ibyaha, rimwe rikaba rishinzwe kurwanya ihohoterwa rishingiye ku gitsina, irindi rikaba rishinzwe kurwanya ibiyobyabwenge.

Mbere y’icyo gikorwa, abo banyeshuri babanje kugirana ikiganiro n’ushinzwe imikoranire ya Polisi y’u Rwanda n’abaturage  ndetse n’izindi nzego hagamijwe ubufatanye mu kwicungira umutekano muri aka karere, Inspector of Police (IP) Viateur Ntiyamira, akaba yarababwiye ingaruka z’ihohoterwa rishingiye ku gitsina no kwishora mu biyobyabwenge, kandi abasaba gukoresha ubumenyi bafite mu guhindura imyumvire y’abatuye hafi y’amashuri yabo.

Bamaze kunyurwa n’ibyo yabigishije, ni bwo abo banyeshuri bashyizeho ayo mahuriro, ndetse biyemeza kugira uruhare rugaragara mu kurwanya ibyaha muri rusange.

Uwatorewe kuba Umuhuzabikorwa w’ihuriro ryo kurwanya ibiyobyabwenge, Nsanzumuhire Jean de Dieu yagize ati:"Imbaraga zacu nk’urubyiruko tugomba kuzikoresha mu bikorwa byiza biteza imbere igihugu. Ni k’uby’iyo mpamvu twashyizeho  iri huriro kugira ngo tugire uruhare mu kwicungira umutekano dusobanurira abantu b’ingeri zose ububi bw’ibiyobyabwenge, kandi tubakangurira kubyirinda."

Mugenzi we watorewe kuyobora iryo kurwanya ihohoterwa rishingiye ku gitsina, Iradukunda Adeline yagize ati,"Twe tuzi ingaruka za bene iri hohoterwa ni natwe tugomba gufata iya mbere mu kurirwanya  tubisobanurira abandi; kandi tubakangurira kuryirinda no gutanga amakuru y’abarikora."

Mu gihugu hose hamaze gushyirwaho amahuriro arenga igihumbi yo kurwanya ibyaha, kandi 90% yayo ari mu bigo by’amashuri.

By’umwihariko muri aka karere hamaze gushyirwaho amahuriro 48 yo kurwanya ibyaha, muri yo 30 akaba ari mu mashuri 15; aho muri buri shuri hari abiri.

Indirimbo, imivugo n’amakinamico biri mu byo abanyeshuri bacishamo ubutumwa bwo kurwanya ibyaha.

Umuyobozi w’Urwunge rw’amashuri rwa Rugali, Nsekarije François yashimye Polisi y’u Rwanda ku nama yagiriye abo banyeshuri, kandi ayizeza ko azababa hafi kugira ngo ayo mahuriro bashyizeho agere ku ntego.

Na none abanyeshuri  bagera ku 2500 bo mu  Rwunge rw’amashuri rwa Kigarama nabo mu rwa Rugamba, ho mu karere ka Rutsiro, barangajwe imbere n’abarezi babo, na bo bashyizeho amahuriro 2 yo kurwanya ibyaha.

Abo banyeshuri bahawe ubumenyi ku icuruzwa ry’abantu, amayeri y’abarikora, abo bibasira, aho bajyanwa, n’ingaruka abashorwa muri ubu bwoko bw’ubucakara bahura na zo.

Ushinzwe imikoranire ya Polisi y’u Rwanda n’abaturage ndetse n’izindi nzego hagamijwe ubufatanye mu kwicungira umutekano muri aka karere, Assistant Inspector of Police (AIP) Jean Bosco Mugenzi yabwiye abo banyeshuri ati,"Kurwanya icuruzwa ry’abantu birasaba ubufatanye binyuze mu guhanahana amakuru y’ucyekwaho gukora iki cyaha."