Kinyarwanda
English
Kuri uyu wa Gatanu tariki ya 6 Werurwe, abanyeshuri biga mu kigo cy'amashuri cya Jardin des tout-petits giherereye mu murenge wa Kimironko mu Karere ka Gasabo, bagiriye urugendoshuri ku cyicaro gikuru cya Polisi y’u Rwanda ku Kacyiru.
Ni urugendoshuri rwateguwe n'iki kigo hagamijwe ko basobanukirwa imikorere y’amashami atandukanye n'inshingano za Polisi y'u Rwanda muri rusange.
Basuye Ishami rishinzwe kurwanya inkongi n’ubutabazi (Fire and Rescue Brigade), Ishami rya Polisi ryifashisha imbwa mu gucunga umutekano (Canine Brigade) Ishami rishinzwe umutekano wo mu muhanda (Traffic and Road safety) n’itsinda rya muzika rya Polisi y’u Rwanda (Police Band), berekwa akazi gatandukanye gakorwa n’ayo mashami ndetse nabo baboneraho umwanya wo gukora imyitozo-ngiro.
Hamwe n’abarezi babaherekeje, abanyeshuri basaga 38 biga mu mashuri y’incuke, bakiriwe na Komiseri ushinzwe ubutwererane na porotokole, Assistant Commissioner of Police (ACP) Khalid Kabasha, abasobanurira inshingano za Polisi y’u Rwanda muri rusange n’imikorere y’amashami yayo atandukanye.
Yagize ati: “Inshingano z’ibanze za Polisi y’u Rwanda ni ukurinda umutekano w’abantu n’ibyabo, inshingano zishyirwa mu bikorwa binyuze mu mashami n’imitwe itandukanye ikorera mu gihugu hose.”
ACP Kabasha yabagaragarije ko gusurwa n’abana bato bitagira uko bisa kuko ibyo bigishijwe babifata vuba kandi bakabigumana ari nako babyigisha n’abandi babasha guhura nabo, ashimira ubuyobozi bw’ishuri kuba bwarahisemo gusura Polisi y’u Rwanda kugira ngo abana basobanukirwe inshingano zayo n'uburyo zishyirwa mu bikorwa.
Mutabazi Barbara, uyobora iki kigo cy'ishuri yashimiye Polisi y’u Rwanda ku mahirwe abana bahawe ngo bamenye imikorere yayo n’amashami yayo atandukanye avuga ko ari intambwe nziza izabafasha kurushaho gukura bakunda igihugu.
