Kinyarwanda
English
Polisi y’u Rwanda yakiriye kuri uyu wa Mbere tariki 9 Ugushyingo, abanyeshuri 197 bo mu mwaka wa gatandatu w’amashuri abanza n’abarezi batandatu bo mu kigo cya St Vincent Pallotti giherereye mu murenge wa Masaka mu Karere ka Kicukiro.
Ni urugendoshuri bagiriye ku Cyicaro gikuru cya Polisi ku Kacyiru, rwari rugamije kubungura ubumenyi ku nshingano za Polisi, uburyozishyirwa mu bikorwa n’uruhare rwabo mu gufatanya n’inzego zishinzwe umutekano mu kurushaho kuwubumbatira.
Basobanuriwe inshingano za Polisi y’u Rwanda zirimo gukumira ibyaha, kugenzura uko amategeko yubahirizwa, umutekano wo mu muhanda, gukumira no kurwanya inkongi n’ibikorwa byo gutabara abari mu kaga mu buryo bwihuse.
Umuvugizi wa Polisi y’u Rwanda, Assistant Commissioner of Police (ACP) Boniface Rutikanga, yagarutse ku ruhare rw’abakiri bato ku mutekano nk’inshingano duhuriyeho twese zo kuwubumbatira.
Yagize ati: "Ku bakiri bato; gusobanukirwa akazi ka Polisi bibafasha kumenya akamaro k'umutekano n'uruhare rwabo mu kuwubungabunga. Umutekano ni inshingano duhuriyeho twese, harimo n'abana, nabo bagomba kuwugiramo uruhare."
ACP Rutikanga yashimangiye ko imyitwarire myiza, kubaha amategeko no kwitwararika ari iby’ingenzi biranga abaturage beza, ashishikariza abanyeshuri kubahiriza amabwiriza ku ishuri no mu rugo, kubaha abandi, kurinda umutungo rusange no gufata imyanzuro iboneye mu mibereho yabo ya buri munsi.
Ku bijyanye n’umutekano wo mu muhanda, ACP Rutikanga yasabye abanyeshuri kubahiriza amategeko y’umuhanda birinda ibyabateza impanuka nko kunyura ahatemewe cyangwa gukinira mu muhanda, abashishikariza kuba ba ambasaderi ba Polisi bageza ubutumwa ku miryango yabo no ku bandi banyeshuri.
Umuyobozi w'Ishuri, Bimenyimana Marie Cécile, yashimiye Polisi y'u Rwanda kuba yaremeye ubusabe bw’ikigo, avuga ko uru ruzinduko ari amahirwe akomeye ku banyeshuri bitegura gukora ikizamini gisoza amashuri abanza mu kubafasha guhuza ibyo bigiye mu ishuri n’ibikorerwa mu kazi.
