POLISI Y'U RWANDA

Kuri uyu wa Gatanu tariki ya 22 Gicurasi, abanyeshuri 142 biga mu bigo by'amashuri bitatu bari baherekejwe n'abarezi babo bagiriye urugendoshuri ku cyicaro gikuru cya Polisi y’u Rwanda ku Kacyiru.

Aya mashuri atatu ariyo; Ecole Internationale de Kigali ribarizwa mu murenge wa Kimihurura mu Karere ka Gasabo, Eden School Kamembe ryo mu Karere ka Rusizi na Centre cyprien & Daphrose Rugamba iherereye mu murenge wa Remera, akarere ka Gasabo, abanyeshuri, abarezi na bamwe mu bahagarariye ababyeyi barerera muri ibyo bigo, basuye Polisi mu masaha atandukanye kuva saa yine za mu gitondo kugeza saa kumi z'umugoroba, basobanurirwa ibijyanye n'inshingano za Polisi ndetse n'akazi gakorwa n'amashami yayo.

Basuye Ishami rishinzwe kurwanya inkongi n’ubutabazi (Fire and Rescue Brigade), Ishami rya Polisi ryifashisha imbwa mu gucunga umutekano (Canine Brigade) n'Ishami rishinzwe umutekano wo mu muhanda (Traffic and Road safety) berekwa akazi gatandukanye gakorwa n’ayo mashami ndetse nabo bikorera imyitozo ijyanye nabyo. 

Hamwe n’abarezi babo n’ababyeyi bahagarariye abandi, aba banyeshuri biga mu mashuri abanza, bakiriwe n’umuvugizi wa Polisi y’u Rwanda, Assistant Commissioner of Police (ACP) Boniface Rutikanga, abasobanurira inshingano za Polisi y’u Rwanda muri rusange, amashami atandukanye ayigize n’imikorere yayo  ya buri munsi, n'uburyo ifatanya n'abaturage barimo n'abanyeshuri mu gukumira ibyaha bitaraba mu kwirinda akaga n'izindi ngaruka byateza.

ACP Rutikanga yashimiye abayobozi b’amashuri kuba barahisemo gusura Polisi y’u Rwanda kugira ngo abana bamenye kandi basobanukirwe inshingano zayo n'uburyo zishyirwa mu bikorwa.

Yagize ati: “Abana bavamo abarimu beza kuko nk'urugero, iyo bigishijwe bamenya uko bubahiriza ibyapa n’ibimenyetso byo mu muhanda bikabafasha kwirinda impanuka. Ku bijyanye n'inkongi bamenya uko bazirinda n'uko bazirwanya, kimwe n'ibindi bikorwa bya Polisi hagamijwe kurushaho kubungabunga umutekano w’abaturarwanda. Babifata mu mutwe ndetse bakagenda babyigisha abandi bana, baba abo bigana, abo baturanye n’ababyeyi babo bityo ubutumwa bukagera henshi.’’

ACP Rutikanga yasoje ashimira abana n’abaje babaherekeje, ababwira ko gusurwa n’abana bato bitagira uko bisa kandi ko abanyeshuri baza mu bafatanyabikorwa b'ingenzi ba Polisi mu gukumira no kurwanya ibyaha cyane cyane gukoresha no gukwirakwiza ibiyobyabwenge bikorwa ahanini n'abiganjemo urubyiruko.

Abarimu bigisha muri aya mashuri bashimiye Polisi y’u Rwanda ku mahirwe abana bahawe ngo bamenye imikorere yayo, avuga ko ari intambwe nziza izabafasha kurushaho gukura bakunda igihugu.

Mvuyekure Patrick ushinzwe amasomo mu kigo cya Centre cyprien & Daphrose Rugamba yavuze ko abana barererwa muri iki kigo baba barakuwe ku mihanda mu gihugu hose mu rwego rwo kubagorora no kubigisha indangagaciro zibagira abana beza.

Yagize ati: “Aba bana turera baba barakuwe mu buzima bwo ku muhanda bakazanwa mu kigo ngororamuco n’abapolisi baba babafatiye mu makosa atandukanye. Rero niyo mpamvu twahisemo kuza gusura Polisi y’u Rwanda kugira ngo abana basobanukirwe ko Polisi idakora akazi ko gufunga abantu gusa ahubwo igira n’andi mashami menshi ashinzwe ubutabazi ndetse n’ibindi ikora bijyanye n’iterambere ry’abaturarwanda’’.

Mvuyekure yasobanuye ko aba bana bigishwa amezi atandatu bagasubizwa mu miryango yabo, ariko ko bakomeza gukurikiranwa kugeza barangije amashuri yisumbuye, bagahabwa ibikoresho n’amafaranga y’ishuri kugira ngo batazasubira mu muhanda dore ko n’imiryango yabo ifashwa iyo basanze itishoboye.