POLISI Y'U RWANDA

Ku itariki ya 15 Nyakanga, abanyeshuri bagera kuri 370 biga mu ishuri ryisumbuye rya Kigarama (ES Kigarama) riri mu murenge wa Rugenge akarere ka Ngoma, bahawe na Polisi y’u Rwanda ikorera muri ako karere ibiganiro bibakangurira kwirinda no kurwanya ibiyobyabwenge n’ibindi byaha.

Umupolisi ushinzwe guhuza ibikorwa bya Polisi n’iby’abaturage mu karere ka Ngoma Inspector of Police (IP) Roger Rwakayiro yasobanuriye aba banyeshuri icyo ibiyobyabwenge aricyo, anababwira amoko y’ibiyobyabwenge bikunze kugaragara mu Rwanda, abamenyesha ingaruka zo kubikoresha, banafatira hamwe ingamba zo kubyirinda no kubirwanya.

IP Rwakayiro yasabye abanyeshuri nk’urubyiruko rw’ejo hazaza kwirinda umuntu wese wabashora mu gukoresha ibiyobyabwenge kuko bishobora gutuma bishora mu gukora ibindi byaha  nk’ubusambanyi n’ibindi .

Yagize ati:”Ibiyobyabenge  bigira ingaruka mbi kandi nyinshi zirimo, nko kwishora mu busambanyi ukaba wahandurira indwara zandurira mu mibonano mpuzabitsina zirimo na Sida cyangwa se ukaba watwara inda itateguwe, bigatuma uva mu ishuri n’ izindi ngaruka”.

Yakomeje abasaba kwirinda ikintu icyo aricyo cyose cyabarangaza, anabasaba ko bakwita ku masomo yabo, kugirango bazavemo abanyarwanda bafite ubumenyi buzabafasha kwiteza imbere bakanateza imbere u Rwanda.

Yanabakanguriye kandi kwirinda no kurwanya ihohoterwa ryo mu ngo, irikorerwa abana n’icuruzwa ry’abantu, bagaharanira kugira isuku haba ku mubiri no ku myambaro, ku ishuri no mu ngo iwabo.

Nyuma y’ibiganiro, abanyeshuri bahawe umwanya wo kubaza ibibazo no gusobanuza ibyo batumvaga neza, nyuma  biyemeza ko bagiye gushyira imbaraga mu matsinda  bari basanganywe afitanye isano no kurwanya ibyaha, biyemeje kandi kujya batangira amakuru ku gihe y’ikintu cyose gishobora guhungabanya umutekano, haba ku ishuri cyangwa mu miryango yabo, ndetse biyemeza kuba abafatanyabikorwa ba Polisi mu gukangurira bagenzi babo kwirinda ibiyobyabwenge, no kuzageza ubutumwa bahawe mu miryango yabo n’aho batuye igihe bazaba bagiye  mu biruhuko.