POLISI Y'U RWANDA

Mu gitondo cyo kuri uyu wa Kane tariki ya 5 Gashyantare, abanyeshuri biga mu kigo cya ‘Ecole les Hirondelles de Don Bosco’ giherereye mu murenge wa Ndera mu karere ka Gasabo, bakoreye urugendoshuri ku cyicaro gikuru cya Polisi y’u Rwanda.

Ni urugendoshuri bateguye mu rwego rwo kubafasha kumenya no gusobanukirwa imikorere n’inshingano bya Polisi, rukaba rwitabiriwe n'abagera kuri 75 biga mu mwaka wa gatatu w’amashuri abanza bari baherekejwe n’abarezi babo.

Basobanuriwe amateka ya Polisi y’u Rwanda, uko yashinzwe, intego, inshingano zayo ndetse n'amashami yayo atandukanye.

Beretswe imikorere y’ Ishami rishinzwe kurwanya inkongi n’ubutabazi (Fire and Rescue Brigade) n’Ishami rya Polisi ryifashisha imbwa mu gucunga umutekano (Canine Brigade banakora imyitozo-ngiro yo kwirinda no kurwanya icyateza inkongi bitewe n’icyayiteye hifashishijwe ibizimyamuriro bitandukanye.

Bigishijwe kandi ku mikorere y’imbwa zifashishwa mu gucunga umutekano harimo ibikorwa byo gusaka, gutahura ibiyobyabwenge bihishe n’ababikoresha ndetse n’ibisasu cyangwa ibindi biturika.

Assistant Commissioner of Police (ACP) Khalid Kabasha, ushinzwe ubutwererane na porotokole, yabashimiye kuba barahisemo gukorera urugendoshuri muri Polisi y’u Rwanda kuko kwigisha umwana ari ukwigisha umuryango mugari.

Yagize ati: “Twishimira gusurwa n’abana bato nk’aba kuko ibyo tubigishije barabifata bakabigumana kandi bakanabyigisha n’abandi bana, ababyeyi n’abaturanyi. Niyo mpamvu rero uyu uba ari umwanya mwiza kuri twe kubigisha imikorere ya Polisi kugira ngo igere hose.”

ACP Kabasha yakomeje abashishikariza kuba ba Ambasaderi beza ba Polisi y’u Rwanda mu bukangurambaga bwa Turindane Tugereyo Amahoro, bigisha bagenzi babo n’abakuru imikoreshereze myiza y’umuhanda, no gufata ingamba zo kwirinda igishobora guteza impanuka cyose.

Umuyobozi w'ishuri wungirije ushinzwe amasomo, Bizimungu Aristide, yavuze ko bahisemo gusura Polisi y’u Rwanda mu buryo bwo gufasha abana kumenya neza ibyo biga.

Yagize ati: “Abana bagira amasomo atandukanye arimo no kumenya neza igihugu ndetse n’ibigikorerwamo, ni muri urwo rwego rero twifuje kuza gusura icyicaro gikuru cya Polisi, cyane cyane ko abana ari bo bahakunze bakahahitamo. Twaje rero kugira ngo tumenye ibihakorerwa ndetse bikaba n’uburyo bwo gukangurira abana akamaro k’umutekano, binashobotse ejo hazaza nabo bakazaba bamwe mu bawushinzwe.”

Bizimungu yashimiye uburyo bakiriwe, ashimangira ko usibye kuba abana bahakuye ubumenyi n’abarezi bahungukiye byinshi batari bazi kandi ko bazabisangiza na bagenzi babo.