POLISI Y'U RWANDA

Polisi y’u Rwanda mu turere twa Rulindo, Nyanza na Ngoma, muri iki cyumweru yagiranye inama n’abatwara abagenzi kuri moto muri utu turere; ibakangurira kugira uruhare mu kubungabunga no gusigasira umutekano wo mu muhanda; birinda icyatuma bakora cyangwa bateza impanuka.

Mu kiganiro yagiranye n’abagera kuri 65 bo muri Rulindo, bibumbiye muri Cooperative de Taxis Moto de Base (COTAMOB), bakorera mu mirenge ya Base na Bushoki; Umuyobozi wa Polisi y’u Rwanda muri aka karere, Superintendent of Police (SP) Aphrodis Gashumba yababwiye ko impanuka zo mu muhanda zikorwa n’abamotari, ziterwa ahanini n’ubumenyi buke ku gutwara moto, kuyitwara usinze cyangwa unaniwe, umuvuduko urenze utegetswe n’amategweko, ndetse n’uburangare.

Yababwiye ati," Gutwara moto; ndetse n’ibindi binyabiziga bisaba ubushishozi . Uyitwaye asabwa kwirinda  ikintu cyose gishobora kumurangaza. Kutubahiriza amategeko y’umuhanda ni ugushyira mu kaga ubuzima bwanyu, ndetse n’ubw’abandi bakoresha inzira nyabagendwa. Murasabwa rero kuyubahiriza kugira ngo mugire uruhare mu kububungabunga."

Mu butumwa yagejeje ku bamotari bo mu karere ka Nyanza bagera kuri 320, bibumbiye mu Mashyirahamwe atanu, ari yo: MODRIKONYA , KOTAMONYA  , KOTAMOBU , KOTAMORU N’IMENA TAXI MOTO; Umuyobozi wa Polisi y’u Rwanda muri aka karere, Chief Inspector of Police (CIP) Protais Rwiyemaho yagarutse ku ngaruka zo kwica amategeko y’umuhanda; aho yababwiye ko impanuka zikomeretsa no guhitana bamwe mu bawukoresha; kandi ko usibye n’ibyo, zangiza ibikorwa remezo bitandukanye; ndetse zigateza igihombo ba nyiri ibinyabiziga byazikoze (impanuka).

Yabasabye gucika ku muco mubi wo kuburirana ko mu cyerekezo bajyamo hari, cyangwa ko nta mupolisi wo mu ishami rya Polisi y’u Rwanda rishinzwe umutekano wo mu muhanda urimo; aha akaba yarababwiye ko biri mu biteza impanuka; bitewe no kwirara, kuko nta cyo baba bikanga.

Yababwiye ati,"Ntimugakorere ku ijisho. Mujye mwibuka ko mutwaye abantu; kandi ko mufite inshingano zo kubungabunga umutekano wabo; bityo, mwubahirize amategeko n’amabwiriza abagenga."

Ushinzwe imikoranire ya Polisi y’u Rwanda n’abaturage, ndetse n’izindi nzego mu karere ka Ngoma, Inspector of Police (IP) Roger Rwakayiro yasabye abamotari bagera kuri 95 bakorera mu murenge wa Rukira, mu karere ka Ngoma; kwambara ingofero yabugenewe (casque) igihe batwaye moto, kandi bagatangira gutwara moto umugenzi na we amaze kuyambara.

IP Rwakayiro yabibukije ko bagomba gutwara umugenzi umwe, kugira no kugendana ibyangombwa bisabwa umuntu utwaye moto, guhagarara igihe bahagaritswe n’Umupolisi  cyangwa undi ubifitiye ububasha; kandi bakubahiriza andi mategeko abagenga; harimo kwirinda gutwara imitwaro n’umugenzi icya rimwe.

Abo bamotari bakorera mu murenge wa Rukira bashyizeho amahuriro abiri yo gukumira no kurwanya ibyaha.