Kinyarwanda
English
Mu nama umupolisi uhagarariye ishami rya Polisi rishinzwe umutekano wo mu muhanda n’ushinzwe guhuza ibikorwa bya Polisi n’iby’abaturage mu karere ka Huye bagiranye n’abamotari bakorera mu mujyi wa Huye ku itariki ya 4 kamena, babasabye kubahiriza amategeko y’umuhanda kugirango birinde impanuka.
Assistant Inspector of Police (AIP), Tuyisabe Bernardin uhagarariye ishami rya Polisi rishinzwe umutekano wo mu muhanda yanasabye abo bamotari kwibumbira mu mashyirahamwe, kwitwaza ibyangombwa bose bikenerwa kugirango wemererwe gutwara ikinyabiziga n’abagenzi.
AIP Tuyisabe yakomeje ababwira ko kugirango bakore akazi kabo neza bakwiye kwirinda gupakira imitwaro irengeje ubushobozi bwa moto zabo, kwirinda umuvuduko ukabije kuko ibyo byose bitera impanuka.
Assistant Inspector of Police (AIP) Joseph Sebutekera ushinzwe guhuza ibikorwa bya Polisi n’iby’abaturage mu karere (DCLO), we yabibukije kwirinda ikintu cyose cyabagusha mu cyaha harimo gutunda no kunywa ibiyobyabwenge n’inzoga z’inkorano.
Yakomeje asaba abo bamotari kugirana inama, ndetse bagahana bamwe muri bo bahesha isura mbi umwuga wabo ndetse bagaha amakuru Polisi ya bamwe muri bo bica amategeko.
Aba bamotari basabwe kugumya gukorana neza na Polisi n’izindi nzego zishinzwe umutekano, bagamije gukumira no kurwanya ibyaha mu miryango yabo.
Umunyamabanga nshingwabikorwa w’umurenge wa Ngoma Kabalisa Arsene nawe wari witabiriye iyi nama, yasabye abo bamotari gushyira mu bikorwa gahunda za Leta, kandi bagaharanira kwiteza imbere.
