Kinyarwanda
English
Ku itariki ya 18 Ukuboza 2016, ku cyicaro cya koperative y’abamotari ba Gatsibo habereye ibiganiro byahuje abayobozi b’abamotari bakorera mu mirenge yose igize aka karere, baganira uko barushaho gukora akazi kabo neza birinda icyahungabanya umutekano.
Umupolisi ushinzwe guhuza ibikorwa bya Polisi n’abaturage (DCLO) muri Gatsibo Inspector of Police (IP) Jean Baptiste Bucyangenda, yaboneyeho umwanya wo kubaganiriza, ababwira amahame yo kwicungira umutekano anabakangurira kwirinda ibyaha bikorwa na bamwe muri bo.
Yababwiye ko iterambere bashaka ritagerwaho nta mutekano, abasaba kurwanya ikintu cyose cyawuhungabanya, nabo bakirinda gukora ibinyuranyije n’amategeko.
IP Bucyangenda yaravuze ati:”Bamwe muri mwe cyangwa bagenzi banyu bagaragara mu makosa atandukanye, hari abatwara badafite ibyangombwa, abatwara abagenzi basinze, abafasha abagizi ba nabi kwinjiza ibiyobyabwenge na magendu mu gihugu,kugendera ku umuvuduko ukabije, kuvugira kuri telephone batwaye abagenzi, kutambara no kudaha abagenzi ingofero zabugenewe, n’ibindi byaha.
Ariko Polisi y’u Rwanda izi neza ko hari n’abandi muri mwe bafatanya nayo mu gucunga umutekano, ni muri urwo rwego tubasaba ko mwagira inama n’abagaragara muri ibi bikorwa bibi kubicikaho, nabo bagafatanya n’inzego z’umutekano, buri wese akaba ijisho rya mugenzi we, tukagera ku iterambere twiyemeje.”
Yababwiye ko birinze ibyo byaha n’andi makosa bakora, bakubahiriza amategeko agenga umuhanda baba birinze impanuka zikomeretsa cyangwa zigatwara ubuzima bwa bamwe muri bo ndetse n’abagenzi baba batwaye.
Uhagarariye abikorera mu karere ka Gatsibo Mutabuza Benon wari muri iyo nama, yasabye abamotari kubyaza umusaruro amahirwe bafite, aho yagize ati:”Dufite amahirwe menshi muri iki gihugu, kubona Polisi iza kutwigisha uko twafatanya nayo kwirinda impanuka n’ibindi byaha byatuma tugwa mu gihombo? Turi mu bihugu bike bifite Polisi ikora neza kandi yubaha abaturage, kandi aya mahirwe dukwiye kuyabyaza umusaruro tukiteza imbere n’igihugu cyacu muri rusange.”
Umuyobozi w’impuzamashyirahamwe y’abamotari bakorera mu karere ka Gatsibo Rwabarinda Aloys yashimye inama n’ubufasha Polisi y’u Rwanda idahwema guha abamotari ba Gatsibo, asaba bagenzi be gukangurira abo bakora akazi kamwe kurushaho kwicungira umutekano.
Yaravuze ati:”Kubera umutekano usesuye igihugu cyacu gifite, dukora akazi kacu amasaha yose kandi tukagakora nta nkomyi, ni ngombwa rero ko natwe tugira uruhare mu gusigasira uwo mutekano, twirinda icyaha, tukubahiriza amtegeko, kandi tugatanga amakuru y’uwakoze cyangwa utegura gukora ikintu cyose kinyuranyije n’amategeko, kandi tugashyira mu bikorwa inama Polisi ihora itugira.”
Inama yarangiye aba bamotari bose bafashe umwanzuro wo gukomeza gufatanya na Polisi y’u Rwanda mu kwicungira umutekano, bakubahiriza amategeko kandi bakagira inama bamwe muri bagenzi babo bakigaragara mu makosa, ku buryo mu gihe gito hazagaragara impinduka mu mikorere yabo.
