Kinyarwanda
English
Urubyiruko rugera kuri 32 rwari ruzwiho gukora ibyaha bitandukanye mu gace ka Nyabugogo, ku cyumweru ariki ya 30 Ugushyingo basuwe n’umuyobozi w’ishami rya Polisi rishinzwe guhuza ibikorwa bya Polisi n’abaturage hagamijwe gukumira no kurwanya ibyaha (Community Policing) Assistant Commissioner of Police (ACP) Damas Gatare abakangurira kwirinda ibyaha no kureka ibikorwa bibi bakoraga bihungabanya umutekano, bakaba intangarugero mu muryango nyarwanda.
Uru rubyiruko ruzwi ku izina ry’”abamarine” rwari ruzwi mu bikorwa bibi birimo ubujura ubwambuzi, kunywa ibiyobyabwenge n’ibindi, ubu rukaba rwarabivuyemo rwibumbira mu ishyirahamwe ryitwa “Hinduka uhindure abandi”.
ACP Gatare yabwiye uru rubyiruko ko rudakwiye kwangiza ubuzima bwabo, ahubwo bakwiye kuba intangarugero mu muryango nyarwanda, abasaba no kwirinda bagenzi babo bashobora kubasubiza inyuma bakabasubiza mu byaha.
Akaba yagize ati:”Mu gihugu cyacu, buri munyarwanda agomba gukora igishoboka cyose ngo yiteze imbere ateze n’imbere umuryango we n’igihugu muri rusange. Ndabasaba kwirinda ibyasubiza ubuzima bwanyu inyuma mukanagira inama bagenzi banyu bakiri mu bikorwa bibi”.
Umuyobozi w’ishyirahamwe ry’uru rubyiruko Jean Damascene Niyonzima, yashimiye Polisi y’u Rwanda kubera inama n’inkunga idahwema guha urubyiruko, avuga ko ubu bashyize hamwe imbaraga zabo mu kubaka no guteza imbere igihugu.
Iyi nama ikaba yari yanitabiriwe n’umunyamabanga nshingwabikorwa w’inama y’igihugu y’urubyiruko Nkuranga Alphonse, umuyobozi wa Polisi mu karere ka Gasabo Chief Superintendent of Police (CSP) Dan Ndayambaje n’abandi bayobozi batandukanye.
