POLISI Y'U RWANDA

Itsinda ry’abadepite  bagize komisiyo y’ububanyi n’amahanga, ubutwererane n’umutekano, kuri uyu wa gatatu tariki ya 14 Werurwe 2015 basuye Polisi y’u Rwanda basobanurirwa imiterere y’umutekano wo mu muhanda no ku mipaka, n’ingamba zafashwe mu kongera umutekano wo mu muhanda.

Bageze ku cyicaro gikuru cya Polisi ku Kacyiru, bakiriwe n’umuyobozi mukuru wa Polisi y’u Rwanda IGP Emmanuel K. Gasana, wabasobanuriye uko umutekano uhagaze mu Rwanda ndetse n’ingamba zafashwe mu  kurwanya ibiteza umutekano mucye mu muhanda.

Bimwe mu biteza impanuka mu muhanda ni uburangare bw’abashoferi n’abamotari, kuvugira kuri telephone igihe batwaye, umuvuduko ukabije, gutwara ibinyabiziga bitaciye mu kigo cya Polisi gipima ubuziranenge bw’ibinyabiziga, n’izindi.

IGP Gasana yabasobanuriye ko Polisi y’u Rwanda ihora ishakisha icyatuma abanyarwanda baba mu mutekano usesuye, ari nayo mpamvu hashyizweho icyumweru cyahariwe umutekano wo mu muhanda, ibiganiro binyura kuri radiyo byigisha kwirinda impanuka, ikigo cya Polisi gipima ubuziranenge bw’ibinyabiziga, uburyo bworoshye kandi bwihuse bwo kubona uruhushya rwo gutwara ikinyabiziga, gushyiraho ahantu abashoferi bakora urugendo rurerure babanza kuruhukira bakabona kongera gutwara bamaze kuruhuka, gushyira abapolisi benshi mu muhanda cyane cyane imihanda yerekeza mu ntara kandi bafite ibikorersho bishobora kubonera kure umuvuduko w’umushoferi, n’izindi.

Nyuma y’ibi biganiro, umuyobozi wungirije w’iyi komisiyo, Depite Mukakalisa Jeanne d’Arc yavuze ko intego yabo ari ukugenzura imiterere y’umutekano wo mu muhanda no ku mipaka, akavuga ko bunguranye ibitekerezo, nyuma bakazakora raporo nabo bakayigeza ku nteko.

Akaba yashoje agira ati:”Mu nshingano za Polisi y’u Rwanda harimo kubumbatira umutekano w’abantu n’ibyabo, badusobanuriye impamvu zitera impanuka n’ingamba bafashe ngo zikumirwe kandi bagumye kubungabunga umutekano”.