POLISI Y'U RWANDA

Aba ofisiye bakuru ba Polisi 30 baturuka mu bihugu umunani byo muri aka karere biga ibijyanjye n’ubuyobozi ndetse n’indi mirimo ijyanye n’inshingano zabo (Senior Command and Staff Course) mu Ishuri Rikuru rya Polisi y’u Rwanda (National Police College-NPC), ku itariki 2 Nyakanga 2015, bahawe ibiganiro n’impuguke zitandukanye ku kurwanya ibyaha hagamijwe kubumbatira no gusigasira umutekano ndetse no kwimakaza ubutabera mu buryo burambye.

Ibyo biganiro byari bifite insanganyamatsiko igira iti:”Kurwanya ibyaha” Inkingi ya mwamba mu kubumbatira no  gusigasira  umutekano n’ubutabra mu buryo burambye, byabereye muri iri shuri, riherereye mu karere ka Musanze, mu Ntara y’Amajyaruguru.

Aba ba ofisiye bakuru ba Polisi bahawe ibiganiro bagize ikiciro cya gatatu cy’abakurikiye bene aya masomo muri iri shuri amara umwaka, bakaba nabo bari hafi  kuyasoza.

Abitangiza ibi biganiro  ku mugaragaro, Minisitiri w’Umutekano mu gihugu, Sheikh Musa Fazil Harelimana, yagize ati:"Guhugurwa no gusangira ubumenyi n’ubunararibonye n’izi mpuguke byunganira kandi byagura ubumenyi bwanyu mu kurwanya ibyaha hagamijwe kubumbatira no gusigasira umutekano no kwimakaza ubutabera mu buryo burambye".

Yakomeje agira ati:" Ibibazo bitandukanye biri muri aka karere bigira ingaruka ku mutekano w’abagatuyemo. Kubikemura ku buryo burambye bisaba ko abapolisi bakuru baba bafite ibyangombwa bikenewe birimo, ubumenyi no gusobanukirwa imiterere y’ibyo bibazo haba ku rwego rw’ibihugu byabo,ku rwego rw’akarere, ndetse no ku rwego mpuzamahanga".

Minisitiri Harelimana yakomeje abwira aba ba ofisiye bakuru ba Polisi zo muri aka karere ati:"Ndahamanya ndashidikanya ko muri bwunguke ubumenyi muri ibi biganiro buzabashoboza guhangana no gukemura ibibazo by’umutekano no gutanga ubutabera mu buryo burambye”.

Amasomo aba ba ofisiye bakuru ba Polisi bahawe kimwe n’ibindi byiciro bibiri byababanjirije, yibanze ahanini ku gufata ibyemezo nka bamwe mu bayobozi bakuru b’uru rwego rw’umutekano n’imicungire myiza y’abo bashinzwe, bakaba nyuma y’aya masomo bahabwa impamyabumenyi  y’icyiciro cya gatatu cya kaminuza mu bijyanye no kwimakaza umuco w’amahoro no gukemura amakimbirane.

Aba ba ofisiye bakuru bahawe ibiganiro bakomoka mu bihugu umunani aribyo:Uburundi, Ethiopia, Gambia, Kenya, Namibia, , Sudani y’Amajyepfo, Uganda,n’u Rwanda.

Uretse ibyo bigiye muri NPC, aba ba ofisiye bakuru bakoze kandi ingendoshuri mu Rwanda ndetse no mu bindi bihugu birimo ibyo bamwe muribo bakomokamo, mu rwego rwo guhaha ubumenyi muri ibyo buhugu mu bijyanye n’ibyo bize ndetse n’ibyo bashinzwe muri rusange.

Aho basuye mu Rwanda harimo: Ikigo cy’igihugu gishinzwe imiyoborere (RGB), Komisiyo y’igihugu  Ishinzwe Ubumwe n’ubwiyunge (NURC), Minisiteri ishinzwe gucyura impunzi no kurwanya ibiza (MIDIMAR), uruganda rukora amakaro ruherereye mu karere ka Nyagatare (East African Granite Industries) ndetse n’uruganda rw’Inyange.

Hanze y’u Rwanda, aba ba ofisiye bakuru ba Polisi zo mu bihugu  byo muri aka karere bakoze ingendoshuri mu bihugu bya Kenya na Namibiya, aha muri Namibiya bakaba barakiriwe kandi bagirana ibiganiro n’Umuyobozi wa Polisi y’iki gihugu.

Minisitiri w’Ingabo, James Kabarebe, ari mu batanze ikiganiro, akaba yaganirije aba ba ofisiye bakuru ba Polisi ku ishyirwa mu bikorwa ry’umushiga w’umuhora w’Amajyaruguru (Northern Corridor).

Imishinga y’umuhora w’amajyaruguru irimo kongera ibikorwa by’ingufu z’amashanyarazi mu bihugu bigize aka karere no koroshya urujya n’uruza rw’abagatuye.

Minisitiri Kabarebe yagize ati:"Mbere na mbere, ibihugu by’aka aka karere nibyo bishinzwe umutekano n’iterambere byako. Hari ikigomba gukorwa kugira ngo turusheho kubumbatira umutekano muri aka karere ndetse no gukomeza kugira uruhare mu kuwugarura no kuwubumbatira mu bindi bice  by’Isi."

Yongeyeho agira ati:"Abanyabyaha bahora bahindura uburyo bakora ibikorwa byabo bagamije kugira ngo  badatahurwa. Hari ikizere ko kubera ingamba zashyizweho , ziyongera ku bushake, ubushobozi, n’ubufatanye hagati y’ibihugu bigize aka karere, bizatuma  birushaho gukumira no kurwanya ibyaha, bityo birusheho kubumbatira umutekano no kwimakaza ubutabera".

Minisitiri Kabarebe yasabye ibihugu bigize aka karere kugira ubushake bwa poritiki mu kubumbatira no gusigasira umutekano wako ari nabyo bizatuma imishinga y’Umuhora w’Amajyaruguru ishyirwa mu bikorwa nk’uko yateganyijwe.

Undi mu batanze ibiganiro n’Umuyobozi Mukuru wa Polisi y’u Rwanda,IGP Emmanuel K. Gasana, akaba yaganirije aba ba ofisiye bakuru ba Polisi zo muri aka karere ku isano hagati y’iperereza rikozwe kinyamwuga  n’ubutabera.

Yagize ati:"Turi mu Isi aho abanyabyaha bakoresha ikoranabuhanga mu gukora ibikorwa byabo birimo iterabwoba, icuruzwa ry’abantu n’ibiyobyabwenge, ubujura bw’amafaranga hakoreshejwe ikoranabuhanga, n’ubujura bw’imodoka".

Yakomeje agira ati:"Iperereza rikozwe kinyamwuga niryo rishobora gutuma dutahura ibikorwa byabo no kubiburizamo kandi nibyo byatuma dufata ababikoze cyangwa abategura kubikora bityo tugasigasira umutekano w’abaturage kandi tugaha ubutabera abo ibikorwa byabo byagizeho ingaruka."

Yashimiye abatanze ibiganiro ndetse n'abanyeshuri babikurikiye kandi abwira ba ofisiye bitabiriye ibiganiro kuzashyira mu bikorwa ibyo bigishijwe ku nyungu z'akarere.

Undi watanze ikiganiro, Dr Lukedi Chweya,wo mu gihugu cya Kenya,yagize ati:"Kurwanya ibikorwa by’iterabwoba bisaba ubuhanga buhambaye n’ibikoresho bigezweho kuko abarikora bahora bahindura uburyo bakora ibikorwa byabo."

Yagize kandi ati:"Mu rwego rwo kureshya abantu benshi, abakora iterabwoba bagerageza gusobanura impamvu barikora ndetse bamwe muribo bemera ko kubiburiramo ubuzima ari igikorwa cy’ubutwari. Bifashisha ikoranabunga mu gutegura no gukora ibikorwa byabo bibisha."

Yongeyeho agira ati:"Abakora iterabwoba ntibagira umupaka.Niyo mpamvu nk’abanyafurika dukwiye gufatanya kubirwanya kugira ngo tubumbatire umutekano kuri uyu mugabane kandi tuwuteze imbere ".

Umwe muri aba ba ofisiye bakuru bahawe ibiganiro,Chief Superintendent of Police (CSP) Jean Népo Mbonyumuvunyi yagize ati:"Ibi biganiro ni byiza kuko byunganiraga ibyo twigishijwe. Ubumenyi twungukiyemo ndetse n’ubwo twungukiye mu masomo twigishijwe mu gihe cy’umwaka tumaze muri aya mahugurwa bizatuma turushaho kurwanya ibyaha, kuko ari  intandaro y’umutekano muke."

Undi mu ofosiye mukuru witabiriye ibi biganiro uturuka mu gihugu cy’Ubugande, Superintendent of Police (SP) Alungat Barbara  yagize ati:"Mu gihe cy’umwaka maze hano, nize ibintu byinshi bizanyobora mu mirimo yanjye nindamuka nsubiye mu gihugu cyanjye."

Yagize ati:"Mu bintu bikomeye nungukiye muri aya mahugurwa harimo ukuntu umuturage w’u Rwanda agira uruhare mu kwicungira umutekano. Icyo n’ikintu gikomeye ibihugu byinshi byo muri aka karere ndetse n’ahandi byakwigira ku Rwanda kugira ngo bibumbatire kandi bisigasire umutekano wabyo."

Yongeyeho agira ati:"Tugomba gukomeza gufatanya kugira ngo turwaye kandi dukumire ibyaha birimo ibyambukiramya imipaka bityo abatuye muri aka karere bagire amahoro n’iterambere."

SP Barbara yakomeje agira ati:" Nyuma y’aya masomo twigiye muri NPC,twiteguye kuyashyira mu bikorwa, twiteguye kugaragaza impinduka mu mirimo dushinzwe kuko noneho dufite ubumenyi buhagije bwo kubikora, dufite kandi ubushake n’ubushobozi bwo kubikora ku neza y’abenegihugu b’ibihugu byacu n’akarere muri rusange".